Ushtria kundër kanabisit/ LSI dhe PD bëhen bashkë

21 Tetor 2016, 07:50, Aktualitet CNA

Lëvizja Socialiste për Integrim ka avancuar propozimin e Ministrit të Drejtësisë, Ylli Manjani për përfshirjen e ushtrisë në luftën kundër kanabisit.

Duke e konsideruar situatën alarmante, eksponentë të kësaj force politike janë pro-përfshirjes së ushtrisë, madje duke e argumentuar këtë tezë.

Ish-ministri i Brendshëm, sekretar i Përgjithshëm i LSI, Luan Rama thotë se, përfshirja e ushtrisë nuk është herezi. Sipas tij, Shqipëria ka një histori suksesi në operacionet e kundër trafiqeve në bashkëpunim me ushtrinë.

Në vitin 2002, kur vendi drejtohej nga qeveria Nano ministër i Brendshëm ishte Luan Rama ndërsa ministër i Mbrojtjes ishte Pandeli Majko. Në bashkëpunim me ushtrinë, Policia e Shtetit zhvilloi operacionin ?Puna?, i cili kishte në fokus trafikun e paligjshëm të drogës dhe qenieve njerëzore.

?Nuk shoh asnjë pengesë dhe nuk ka asnjë arsye për të hezituar për ta shfarosur fenomenin e kultivimit një herë e përgjithmonë. Në operacionin e famshëm ?Puna? janë përfshirë në mënyrë shumë ligjore, korrekte dhe kushtetuese edhe forcat e armatosura të Republikës së Shqipërisë. Janë angazhuar të gjitha forcat detare. Është angazhuar me shumë eficiencë edhe njësia speciale, batalioni komando i ushtrisë?, thotë sekretari i Përgjithshëm i LSI-së.

Luan Rama i përgjigjet edhe Tahirit lidhur me deklaratën se situata e kanabisit nuk është aq alarmante sa e bën opozita dhe fronti i së keqes.

?Lufta kundër krimit është gjithnjë alarmante sepse krimi nuk pret që strukturat e shtetit të bëhen gati. Krimi është gjithmonë një hap më përpara?, shprehet numri dy i LSI-së.

Ndërsa anëtarët demokratë të Komisionit të Sigurisë e konsiderojnë vërtet alarmante situatën e kanabisit në vend, por nuk janë pro përfshirjes së ushtrisë, e cila sipas tyre është në varësi direkte të kësaj qeverie.

Deputeti Asllan Dogjani ka thënë për ?Mapo? se në rast së policia është dorëzuar dhe shpall falimentin atëherë mundet që shteti të gjejë rrugë të tjera duke mobilizuar dhe ushtrinë në luftën kundër drogës.

Në këtë rast sipas Dogjanit duhet të shpallet gjendja e jashtëzakonshme, duke suprimuar vendin e Drejtorit të Përgjithshëm të Policisë për ta drejtuar gjenerali i ushtrisë apo dhe vendin e ministrit të Brendshëm, të cilin e merr ministrja e Mbrojtjes.

?Kur ne e dimë që policia është në gjendje të kontrollojë territorin dhe brenda 24 orëve qoftë fizikisht, qoftë me burime operative dhe po të dojë policia nuk mund të mbillet asnjë rrënjë droge, por kur ne e dimë dhe ka prova që drejtuesit e policisë paguhen nga trafikantët e drogës, paguhen për çdo rrënjë drogë, kur kushërinjtë e ministrit të Brendshëm trafikojnë drogë me makinën e ministrit, kur ndërtohen pista për avionë që trafikojnë drogë, kur trafikantët i bllokojnë rrugën prokurorit dhe nuk merret asnjë masë ndaj drejtuesve të policisë, nuk mendoj se do të na duhet të futet Ushtria?, thotë Dogjani.

Të njëjtin qëndrim ndan për këtë çështje edhe nënkryetari i Komisionit të Sigurisë Flamur Ndoka, i cili thotë se kryepleqtë, shefat e komisariateve, drejtorët dhe inspektorët e policisë në zonat ku kultivohet hashash duhet të ishin përpara drejtësisë.

?Por kjo nuk ndodh pasi përqindjen e merr drejtori, ministri deri te kryeministri?, tha Noka. /Citynews