E fundit!

10:45 Kronika

Vrau efektivin e policisë dhe plagosi një tjetër/ Kush është autori i ngjarjes në Maliq

Një ngjarje e rëndë u shënuar këtë të enjte në Lozhan të M...

Drejtuesja e GJKKO-së “rrëzon” Komisionerin Publik/ Si e justifikoi ndryshimin e burimeve financiare

12 Qershor 2022, 11:19, Vetingu CNA

Drejtuesja e GJKKO-së “rrëzon” Komisionerin Publik/ Si e

Drejtuesja e GJKKO-së, Irena Gjoka

Irena Gjoka, kryetarja e Gjykatës së Posaçme të Shkallës së Parë për Korrupsionin dhe Krimin e Organizuar, po përballet me shkallën e dytë të Vettingut.

Gjoka u konfirmua nga Komisioni i Pavarur i Kualifikimit, KPK, në shkurt të vitit 2020.

Por, Komisioneri Publik në atë kohë, Dariel Sina, i cili më vonë u zëvendësua nga Komisionerja Irena Nino kërkojnë shkarkimin e gjyqtares Gjoka.

Sipas Komisioneres publike ka pasaktësi, mospërputhje dhe një balancë të vogël negative që e lëkundin pozicionin e gjyqtares.

Ndryshimi i burimeve financiare

Gjyqtarja Irena Gjoka në KPK

Në deklaratën “Veting”, Gjoka ka shënuar si burime për blerjen e një apartamenti në Tiranë në vitin 2005 për çmimin 45 mijë e 885 euro, kursimet nga pagat ndër vite dhe një hua në shumën 2 milionë lekë.

Ndërsa në vitin 2005 ka deklaruar si burime tërheqjen e një depozite 93 mijë lekë, të një depozite në shumën 800 mijë lekë; të një depozite tjetër në vlerën 4000 USD dhe 15 mijë euro kursime të vitit 2005.

Nga verifikimi i depozitave të deklaruara si burim në 2005-ën ka rezultuar llogaria 93 mijë lekë nuk konfirmohet në emër të subjektit; se në depozitën 800 mijë lekë është shtuar në vijim dhe në 2004-ën është tërhequr shuma 1 milionë e 254 mijë lekë dhe një vit më vonë është depozituar vlera 1.7 milionë lekë.

Sipas komisioneres, gjyqtarja nuk ka deklaruar saktë kursimet kesh në vitin 2004 dhe nuk justifikon me të ardhura të ligjshme krijimin e shumës 1.7 milionë lekë.

Mospërputhje ka edhe për kursimet nga paga në vlerën 15 mijë eurove të deklaruara nga gjyqtarja në 2005-ën.

Po, sipas komisioneres publike, subjekti ka dhënë deklarime kontradiktore lidhur edhe me një shumë prej 4000 USD.

Nino arsyeton se të ardhurat e gjyqtares Gjoka deri në vitin 2002 kur është çelur depozita janë në shumën afro 2.5 milionë lekë dhe nuk i mbulojnë dot kursimet e saj në sistemin bankar në vlerën 4.3 milionë lekë.

Gjoka i ka kundërshtuar në vijimësi të gjitha gjetjet e pretenduara, duke argumentuar se çdo shifër e ka të ligjshme.

“Rrëzohet” Komisionerja Publike

Gjyqtarja Irena Gjoka në KPA

Kolegji i Posaçëm i Apelimit zhvilloi me datë 31.05.2021, seancën gjyqësore publike të çështjes (JR) 36/2020, datë 11.09.2020, që i përket ankimit të Komisioneres Publike kundër vendimit nr. 241, datë 26.02.2020, të Komisionit të Pavarur të Kualifikimit që lidhet me subjektin e rivlerësimit Irena Gjoka.

Gjatë paraqitjes së konkluzioneve përfundimtare, bazuar në provat e reja të paraqitura nga subjekti i rivlerësimit, Komisionerja Publike vlerësoi se subjekti i rivlerësimit arrin në nivel të besueshëm lidhur me kriterin e pasurisë dhe në përfundim, bazuar në nenin F pika 7 e Aneksit të Kushtetutës dhe nenit 59 pika 1 e ligjit 84/2016, i kërkoi Kolegjit lënien në fuqi të vendimit nr. 241, datë 26.02.2020 të Komisionit të Pavarur të Kualifikimit.

Irena Gjoka e ka nisur karrierën në sistemin e drejtësisë në vitin 1993. Gjoka ka punuar si gjyqtare në Gjykatën e Fierit, ndërkohë që në vitin 2014 është emëruar në Gjykatën e Krimeve të Rënda në Tiranë. Që prej dhjetorit të vitit 2019, ajo është pjesë e Gjykatës së Posaçme kundër Korrupsionit dhe Krimit të Organizuar.

Gjoka njihet si një nga gjyqtaret që mori vendimin për dënimin e përjetshëm të autorit të masakrës së vitit 2009 ku u vranë 4 policë, Dritan Dajti. Po kështu ka qenë edhe gjyqtare e çështjes së Saimir Tahirit./CNA.al