ZYRTARE/ Refuzoi operacionin dhe dëmtimet e "bllokuan", Umtiti tërhiqet nga futbolli

15 Shtator 2025, 20:47, Sport CNA

ZYRTARE/ Refuzoi operacionin dhe dëmtimet e "bllokuan", Umtiti

Samuel Umtiti, një nga mbrojtësit më të njohur të Francës dhe pjesë e skuadrës që u shpall kampione bote në vitin 2018, ka vendosur t’i japë fund karrierës së tij në moshën vetëm 31-vjeçare. Vendimi i tij vjen pas shumë vitesh të vështira, të mbushura me dëmtime të përsëritura, të cilat nuk i lejuan të vazhdonte në nivelet e larta të futbollit.

Ai kishte një kontratë me Lilën në kampionatin francez, por gjatë dy sezoneve të fundit arriti të luante vetëm 13 ndeshje, për shkak të problemeve të vazhdueshme me gjurin. Në një postim të publikuar në rrjetet sociale, Umtiti shkruajti se pas një karriere të mbushur me suksese dhe sfida, kishte ardhur momenti të thoshte lamtumirë.

Karriera e tij kulmoi me fitoren e Botërorit të vitit 2018 në Rusi. Umtiti formoi një partneritet të fortë në mbrojtje me Varan dhe u bë vendimtar në gjysmëfinalen ndaj Belgjikës, ku shënoi golin e vetëm të ndeshjes, duke dërguar Francën në finale.

Në atë kompeticion, ai zhvilloi gjashtë ndeshje dhe u rendit ndër figurat kryesore të suksesit francez. Me kombëtaren e tij, ai grumbulloi gjithsej 31 paraqitje, por pas Botërorit hasi probleme me dëmtimet. Në vitet e fundit, ai u aktivizua vetëm gjashtë herë me Francën. Trajneri Deshamp e përshëndeti publikisht, duke theksuar se kontributi i Umtitit ishte i pazëvendësueshëm për Botërorin e vitit 20218.

Edhe me fanellën e Barcelonës, Umtiti pati një karrierë të rëndësishme. Ai luajti 133 ndeshje gjatë shtatë viteve me katalanasit, duke fituar shtatë trofe, përfshirë dy tituj radhazi të La Ligës. Megjithatë, sezonin 2017-18 ai filloi të përballej me probleme serioze në gju.

Megjithëse mjekët e këshilluan për ndërhyrje kirurgjikale, ai vendosi të mos operohej për të ndihmuar Barcelonën dhe Francën, duke luajtur me dhimbje. Ky vendim ndikoi në gjendjen e tij fizike dhe më pas ai nuk arriti më të rikthehej në formën e dikurshme. Pas vitit 2018 nuk e kaloi kurrë shifrën e 18 ndeshjeve në sezon me Barcelonën, pavarësisht trajtimeve të ndryshme mjekësore.

Në vitin 2022, Umtiti u huazua te Leçe në Serinë A, ku u përpoq të gjejë hapësira. Një vit më vonë kontrata e tij me Barcelonën u ndërpre, megjithëse kishte edhe tre vite të tjera të vlefshme. Kalimi te Lila nuk solli ndryshime, pasi problemet fizike e penguan përsëri të luante rregullisht. Pas një periudhe të gjatë të vështirësish, ai vendosi të mbyllë përfundimisht karrierën.

Në mesazhin e tij, Umtiti nuk harroi të falënderojë klubet ku luajti, drejtuesit, trajnerët dhe shokët e skuadrës. Ai theksoi se gjithmonë kishte dhënë maksimumin dhe se nuk pendohej për asgjë nga rrugëtimi i tij.