web counter
LEXO PA REKLAMA!

SHKARKO APP

App Store
Google Play

E konfirmon Vuçiç, zbulohet stadiumi për Serbi-Shqipëri

14 Shtator 2025, 19:18, Sport CNA

E konfirmon Vuçiç, zbulohet stadiumi për Serbi-Shqipëri

Presidenti i Serbisë, Aleksandër Vuçiç deklaroi se ndeshja Serbi-Shqipëri do të luhet në Leskovac dhe jo në Beograd, duke iu referuar informacionit të marrë nga Federata e Futbollit.

Ai e cilësoi këtë si një vendim të mirë, pasi sipas tij në atë qytet atmosfera është më pozitive për kombëtaren. Megjithatë, Vuçiç pranoi se nuk është e sigurt nëse do të lejohen tifozët, pasi UEFA dhe FIFA mund të vendosin ndëshkime për incidentet e ndodhura në ndeshjen me Anglinë.

Kreu i shtetit serb kritikoi ashpër federatën për zgjedhjen e stadiumit “Rajko Mitiç” ndaj Anglisë, duke thënë se nuk i bënte mirë kombëtares. Sipas tij, kjo erdhi për shkak të presioneve të mundshme nga ambasada britanike.

“Më thonë nga federata që me Shqipërinë do të luajmë në Leskovac. Lajm shumë i mirë. Aty e duan kombëtaren dhe atmosfera është pozitive. Nuk e di nëse do të kemi tifozë, sepse FIFA dhe UEFA mund të na dënojnë për idiotësirat që ndodhën ndaj Anglisë. Nëse po, do të bëjmë gjithçka për të mbështetur ekipin.

Nuk e di kush e ndryshoi stadiumin për Anglinë. Ndoshta federata nuk e ka përballuar dot presionin nga ambasada britanike. E luajtëm ndeshjen në Beograd në një atmosferë që nuk i bën mirë kombëtares. Aty tifozët nuk e duan kombëtaren dhe e pamë të gjithë se çfarë ndodhi në tribunë dhe në fushë”, tha Vuçiç.

Ndërkohë, UEFA ende nuk ka zyrtarizuar ndryshimin e stadiumit dhe në faqen e saj vazhdon të figurojë Beogradi si vend i ndeshjes.





Lajmet e fundit nga