ZYRTARE/ Ishte pjesë e Europianit, mbrojtësi njofton tërheqjen nga Kombëtarja shqiptare

3 Tetor 2024, 13:50, Sport CNA

ZYRTARE/ Ishte pjesë e Europianit, mbrojtësi njofton tërheqjen

Ermir Lenjani, është tërhequr nga Kombëtarja shqiptare e futbollit. Kjo u bë e ditur nga vetë mbrojtësi nëpërmjet një postimi në profilin e tij.

Lenjani ishte pjesë e Shqipërisë që nga viti 2013, ndërsa me fanellën kuqezi numëron 45 ndeshje të luajtura dhe pesë gola të shënuar. Arritja më e madhe për të, ishte padyshim pjesëmarrja në Euro 2016.

Në moshën 35-vjeçare, mbrojtësi ka vendosur të tërhiqet nga Kombëtarja. Hera e fundit që Lenjani u grumbullua te Shqipëria, ishte në vitin 2023.

POSTIMI:

Të dashur miq,

Dua t’ju njoftoj se kam vendosur të tërhiqem nga Kombëtarja shqiptare. Një vendim aspak i lehtë, por besoj që është momenti i duhur. Për mua ka qenë gjithmonë nder dhe përgjegjësi e madhe të vesh fanellën e kombit tim.

Jam shumë krenar që emri im është pjesë e historisë së futbollit shqiptar dhe që ëndrra ime e fëmijërisë u realizua në vitin 2016, ku bëmë krenarë kombin kuqezi me përfaqësimin historik për herë të parë në një Kampionat Europian.

Kam plot momente të bukura me fanellën kuqezi, që nga debutimi në ndeshjen ndaj Bjellorusisë, te goli i parë në “Elbasan Arena” ndaj Danimarkës, fitorja historike në “Francë 2016” ndaj Rumanisë dhe grumbullimi im i fundit në muajin mars 2023 me Kombëtaren, ku nisi edhe rruga drejt kualifikimit në “Euro 2024”.

I jam falënderues Zotit, familjes time dhe çdo personi që më ka qëndruar pranë në çdo moment. Çdo fillim e ka një fund dhe rrugëtimi im nuk do të ishte i mundur pa trajnerët Gianni De Biasi, Christian Panucci, Edoardo Reja dhe Sylvio Mendes Campos Júnior, të cilët dua t’i falënderoj nga zemra për besimin e dhënë.

Gjithashtu, dua të falënderoj stafin teknik të Kombëtares, Federatën Shqiptare të Futbollit, Presidentin Armand Duka dhe të gjithë shokët e skuadrës që më kanë mbështetur në rrugëtimin më të veçantë të jetës time.

Në fund, falënderimi im më i madh është për tifozët e Kombëtares shqiptare. Në çdo stadium në Shqipëri dhe në Europë jemi ndjerë si në shtëpinë tonë, falë jush, tifozët më të mirë në botë. Tani e tutje jam si të gjithë ju, gjithmonë krah Kombëtares shqiptare dhe djemve kuqezi.

Faleminderit nga zemra shqiptarë. Një kapitull i mbyllur, por një rrugë e përjetshme!