Sulejman Starova është i bindur: “Final Four” do të jetë spektakolar

29 Prill 2026, 20:11, Sport CNA

Sulejman Starova është i bindur: “Final Four” do të

Kategoria Superiore po hyn në fazën e saj më të nxehtë, ku vetëm tre javë e ndajnë sezonin e rregullt nga verdiktet finale.

Me 10 skuadrat ende në garë për objektivat e tyre, rivaliteti ka arritur kulmin. Sulejman Starova, një nga specialistët më të njohur të futbollit shqiptar, ka vlerësuar rritjen e nivelit të garës dhe ka parashikuar një spektakël të vërtetë në fazën "Final Four".

Sipas Starovës, ndeshjet e fundit si derbi i kryeqytetit dhe përballja mes Elbasanit e Vllaznisë kanë qenë "kryevepra" për kampionatin.

Ai theksoi se gara për vendin e katërt mes Dinamos dhe Partizanit, si dhe përgjysmimi i pikëve për fazën finale, e bëjnë këtë edicion fantastik.

Starova u shpreh i bindur se përballja e skuadrave elitare në "Final Four" do të tërheqë një numër masiv spektatorësh në stadium, duke e shndërruar mbylljen e sezonit në një vitrinë dinjitoze të futbollit tonë.

“Jam i bindur që “Final Four” do të jetë një spektakël, sepse nisem edhe nga dy ndeshjet e fundit. Nivel i kënaqshëm me dy kryevepra: derbi, vitrina e futbollit shqiptar, ku i kishte të gjitha, spektakël i vërtetë, ambienti, atmosfera, tifozët, spektakli gjatë 90 minutave. Një ndeshje që i kishte të gjitha: gola, ritëm, luftë, duele, vendosje të mirë të skuadrave në fushë, kishte edhe përmbysje rezultati që e bëri shumë emocionale.

Po kështu, ndeshja e dy skuadrave që kryesojnë, dy më të mirat, Elbasani dhe Vllaznia, ishte gjithashtu fantastike. Me rregullin që funksionon, ku përgjysmohen pikët, sigurisht që për të dalë kampion kjo është ideja e të dy skuadrave që u ndeshën.

Vazhdon gara për vendin e katërt mes Dinamos dhe Partizanit. Kur të gjitha skuadrat luftojnë deri në ditën e fundit për të plotësuar objektivat, kjo është një gjë fantastike.

Faktet janë që kampionati është bërë shumë interesant. Skuadrat elitare do të përplasen në “Final Four”. Do të jetë një spektakël dhe jam i sigurt që stadiumi, në të gjitha ndeshjet, do të jetë me numër të konsiderueshëm spektatorësh”, u shpreh Starova.

Pak javë para fundit, gara më e fortë duket te mbijetesa, ku janë pesë ekipe që po luftojnë për të mbetur në elitë.

Sa i përket “Final Four”, deri tani pjesëmarrjen e kanë siguruar tre ekipe, Elbasani kryesues, Vllaznia e vendit të dytë dhe Egnatia e vendit të tretë.

Lufta për vendin e katërt bëhet mes Partizanit dhe Dinamos, me këta të fundit të favorizuar.