E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Shans për të marrë arratinë, por tre titullarë të Skënderbeut krijojnë “stres”

15 Mars 2023, 21:45, Sport CNA

Skënderbeu nuk ka në plan që ta humbasë shansin për të marrë arratinë. Shkojnë në Lezhë me mision të qartë për të fituar dhe më pas do të presin me qetësi përballjen e vendit të dytë dhe tretë. Sido që të shkojë rezultati i Flamurtari-Dinamo, për korçarët do të jetë një megabonus. Nëse vlonjatët dalin fitimtarë, atëherë do të linin blutë me 6 pikë pas. Nëse të kundërt, -5 do të shkonin kuqezinjtë.

Për këtë motiv, ndeshja me Besëlidhjen merr vlera akoma edhe më të mëdha. Edhe pse kundërshtari mbyll renditjen dhe praktikisht ka pak mundësi për ta shpëtuar këtë sezon, stafi teknik dhe lojtarët e kanë marrë më shumë se seriozisht. E megjithatë, halle do të kenë. Situata nuk është krejtësisht e qetë për bardhekuqtë këto ditë. Në seancën e djeshme stërvitore janë parë të punojnë të diferencuar tre futbollistë, Ardit Nikaj, Hektor Idrizaj dhe Agnaldo Moraesh, që kanë punuar veçmas grupit.

Burime brenda klubit bëjnë me dije për “Panorama Sport”, se Nikaj dhe Moraesh kanë rishfaqur probleme fizike. Shkodrani në kavilje, ndërsa Moraesh me gjurin. Këto probleme e vënë në dyshim rikuperimin e dy futbollistëve. Nga ana tjetër, edhe Idrizaj ka shfaqur probleme para Tomorit, ndaj edhe nuk u përfshi në atë ndeshje. Problemet kanë vijuar edhe dje, kur mbrojtësi është stërvitur i diferencuar dhe nuk e ka përfunduar plotësisht ciklin.

Tri mungesa këto që mbajnë në ankth bardhekuqtë dhe do të nxisin tek Ivan Gvozdenoviç ndërtimin e një plani B, në se disa prej tyre nuk do të mund të rikuperohen në kohë. Nisur nga kjo situatë, duket se trajneri serb i ka dalë para rrezikut duke filluar që prej ditës së djeshme të mendojë për formacionin duke provuar skema të reja dhe rreshtime të reja loje. Krahas përgatitjeve në terren, korçarët nuk po lënë mënjanë edhe analizimin e kundërshtarit, pavarësisht pozicionit ku ata ndodhen në renditje.

Trajneri ka kërkuar mbi tryezën e punës video të Besëlidhjes, për të parë mënyrën e lojës dhe pikat ku mund të vënë në vështirësi kundërshtarin. Nga ana tjetër, duket se kjo ndeshje do të vlerësohet më shumë se një takim radhe nga Skënderbeu, pasi duke parë përballjen direkt mes Flamurtarit dhe Dinamos mund t’u japë bardhekuqve shansin për të thelluar diferencën në krye të renditjes.