Rrëfimi i Marash Kumbullës/ Nga dëmtimi i rëndë te transferimi në Spanjë

2 Janar 2025, 17:41, Sport CNA

Rrëfimi i Marash Kumbullës/ Nga dëmtimi i rëndë te

Pas disa sezoneve të vështira, prej dëmtimit dhe zgjedhjeve të trajnerëve te Roma, Marash Kumbulla duket se ka gjetur lumturinë.

I transferuar tek Espanyol në fund të merkatos së kaluar, mbrojtësi shqiptar është përshtatur menjëherë, duke u kthyer në një titullar të padiskutueshëm.

Në një intervistë të dhënë në Spanjë, Kumbulla tregon vështirësitë e dëmtimit, ndërsa zbuloi edhe përse pranoi transferimin tek Espanyol.

"Është e vështirë larg fushave. Kur luan futboll rregullisht dhe stërvitesh çdo ditë, ndihesh shumë mirë. Është e vështirë ta ndalosh këtë për tetë muaj. Pas tetë muajve, trupi yt nuk i bën dot ato gjëra që bënte para lëndimit. Duhet më shumë kohë për t’u rikthyer në 100%. Isha i sigurt se do të kthehesha në formën time më të mirë, por pyetja ishte kur. Kishte shumë klube të tjera të interesuara për të nënshkruar me mua, por pas bisedave me trajnerin dhe drejtorin e klubit, menjëherë doja të shkoja tek Espanyol. Ata nuk më premtuan se do të luaja çdo ndeshje, por më bënë të ndihem shumë i sigurt me mënyrën se si më folën. Në fillim isha pak i frikësuar, sepse kjo ishte hera ime e parë jashtë Italisë. Megjithatë, pas një jave, dukej sikur kisha qenë aty prej muajsh. Unë e shijoj futbollin çdo ditë e më shumë, shkoj në stërvitje me një buzëqeshje në fytyrë.”, tha fillimisht Kumbulla.

Mbrojtësi foli edhe për Kombëtaren shqiptare, ku theksoi se është i lumtur që është rikthyer të luajë me fanellën kuqezi. Kumbulla tregoi edhe dy lojtarët më të vështirë me të cilët është përballur në karrierën e tij.

“Ndihem i lumtur me shokët e mi të ekipit, thjesht qesh dhe e shijoj çdo gjë më shumë. Kam luajtur gjithmonë për Shqipërinë para lëndimit, por pas tij, trajneri nuk kishte mundësi tjetër përveçse të luante me të tjerë në pozitën time. Duhej të kthehesha në formën më të mirë, kështu që ishte shumë e rëndësishme për mua t’i luaja ato tri ndeshje në Ligën e Kombeve. Jam shumë i lumtur që po luaj me Shqipërinë përsëri. Kylian Mbappe dhe Vinícius Junior janë lojtarët më të vështirë, kundër të cilëve kam luajtur në karrierën time. Kur luan kundër tyre në jetën reale, e kupton pse janë kaq të mirë. Ata janë në një nivel tjetër. Ishte e pabesueshme të luaja në ‘Santiago Bernabéu’, stadiumi më i mirë ku kam luajtur.

Tek Espanyol kam gjetur një atmosferë ku duhet të mendoj vetëm për atë që ndodh në fushë, mund të përqendrohem në çdo detaj. Pas një viti e gjysmë rikuperimi nga lëndimi, isha pak në dyshik, por tani e shoh veten përsëri si futbollist.”, deklaroi Marash Kumbulla.

Mbrojtësi i Shqipërisë është pjesë e Espanyol në huazim, ndërsa kartoni i tij zotërohet nga Roma. Mbetet të shihet nëse klubi spanjoll do të tentojë ta blejë në fundin e sezonit aktual.