Nga Zidane te Klopp, kandidatët për stolin e Real-it

13 Dhjetor 2025, 13:59, Sport CNA

Te Real Madrid situata mbetet e tensionuar dhe e pasigurt, teksa e ardhmja e trajnerit Xabi Alonso është vënë seriozisht në diskutim. Raportimet e “Sky Sports Germany” bëjnë të ditur se klubi madrilen po përgatitet për të gjithë skenarët, përfshirë edhe mundësinë e një ndarjeje të parakohshme me trajnerin aktual.

Kjo lidhet drejtpërdrejt me rezultatet e fundit, që nuk kanë qenë në nivelin e pritshmërive.
Real Madrid-i ka pësuar dy humbje radhazi, ndër to edhe disfatën ndaj Manchester City-t, dhe pozicionohet vetëm në vendin e shtatë të renditjes së Champions Ligës, një situatë jo e zakonshme për klubin.

Në Madrid ndeshja e radhës kundër Alaves vlerësohet si vendimtare për të ardhmen e Alonso-s. Kjo sfidë përbën testin më të rëndësishëm që nga nisja e mandatit të tij. Klima në ambientet e “Santiago Bernabéu” paraqitet e rënduar, ndërkohë që presioni mbi trajnerin është rritur ndjeshëm. Drejtuesit duan një kthesë të menjëhershme, ndryshe mund të aktivizojnë opsionet e tjera në dispozicion.

Presidenti Florentino Perez ka nisur të shqyrtojë tregun e trajnerëve në rast se situata nuk përmirësohet. Kandidati kryesor për marrjen e drejtimit të ekipit mbetet Zinedine Zidane. Francezi, i cili ka drejtuar Real Madrid në periudhat më të suksesshme ndër vite, shihet si figura më e dëshiruar për t’i rikthyer stabilitetin skuadrës.

Me tre Champions League të fituara radhazi në periudhën 2016–2018 dhe shumë trofe të tjerë, Zidane është gjithmonë një alternativë që konsiderohet me prioritet të lartë.

Në listën e mundësive është edhe Jurgen Klopp. Ish-trajneri i Liverpuli vlerësohet si një profil i aftë për të sjellë identitet të fortë lojtar dhe disiplinë taktike. Megjithatë, raportimet theksojnë se Klop nuk ka dhënë sinjale për rikthim të menjëhershëm në pankinë, gjë që e bën pistën e tij më të vështirë në krahasim me të tjerat.

Emri i tretë që po merret në konsideratë nga Real Madrid është Alvaro Arbeloa. Ish-lojtari i klubit madrilen aktualisht drejton ekipin Real Madrid Castilla. Ai konsiderohet një opsion i brendshëm, i cili njeh mirë filozofinë e klubit dhe strukturën e akademisë. Arbeloa shihet si një zgjedhje më afatgjatë, veçanërisht nëse klubi vendos të përqendrohet te një projekt i bazuar te talentet e reja dhe stabiliteti strukturor.