E fundit!

19:31 Aktualitet

Gabimi trashanik i Veliajt/ Betonieret “pushtojnë” rrugët e Tiranës

Problemi me qarkullimin e mjeteve të tonazhit të rëndë në ...

Fund i "egër" në Superiore, ekipet vetëm për fitore

11 Prill 2025, 18:07, Sport CNA

Fund i "egër" në Superiore, ekipet vetëm për

Superiorja është futur në javët e fundit, që janë edhe vendimtare për fatin e skuadrave. Në këtë afzë, hapat fals janë të ndalur, pasi mund të kenë pasoja të mëdha për të tashmen, por edhe për të ardhmen.

Në kryeqytet, Partizani pret Egnatian, në një sfidë ku spektakli është i garantuar, pasi të dyja skuadrat synojnë titullin kampion.

Humbja e fundit në derbin ndaj Tiranës, e ka vënë në dyshim pjesëmarrjen e të kuqve në Final Four. Trajneri Skënder Gega kërkon rikthimin te fitorja, duke thënë se disfatën ndaj rivalëve të përjetshëm e përjetoi keq. Ai tha gjithashtu se do të ketë ndryshime ndaj Egnatias.

“Humbja e një derbi e ka një impakt gjithmonë. Personalisht e kam përjetuar keq për dy arsye. Jam pjesë e derbit prej shumë vitesh. Keqardhje për mënyrën si u shfaqëm në fushë dhe si u dënuam nga dy penallti dhe një goditje standarde. Nuk mund të vëmë gishtin në një lojtar.

Kujtoj golin e parë të pësuar. Është e pafalshme për një klub si Partizani, që ta pësojë ashtu nga goditja standarde. Ishin tetë lojtarë që vetëm shikonin. Ekipi tjetër ishte më kërkues.

Ndaj Egnatias do të mundohemi të bëjmë ndryshime. Do fusim energji të reja, sepse jemi në fushën tonë. Të mos përsëritet më ajo performancë e derbit”, deklaroi Gega.

Rikthimin te fitorja e presin edhe tek Egnatia, me skuadrën që vjen në këtë takim pas dy humbjeve. Trajneri i rrogozhinasve, Edlir Tetova e cilësoi si fund të egër atë të kampionatit.

“Mendoj që është një përballje që kërkon impenjim maksimal, për të ruajtur vendin e parë dhe për të pasur një vazhdimësi sepse vijmë nga dy humbje, si në Kupë me Partizanin ashtu dhe në kampionat me Elbasanin.

Reparti që po çalon më tepër është mbrojtja, aty duhet të vendos theksin. Sërish kemi mungesa në mbrojtje, mungon Xhemajli, pas dëmtimit në Kupë me Partizanin, po ashtu edhe ndaj Elbasanit nuk ishte. Edhe nesër nuk është i pranishëm. Duke shtuar këtu Malotën edhe Ndrecën po në mbrojtje. Mendoj që me pak kujdes do të bëjmë diçka.

Ka fund të mirë, por ka edhe fund të egër, në këto momente na ka rënë një fund i egër për vetë faktin që të dyja skuadrave iu duhen pikët e plota. Mendoj që do të jetë një ndeshje që do të ketë goxha luftë sportive.

Nuk e kam luksin të menaxhoj titullarët. Jemi me mungesa, jemi munduar të operojmë diçka me mesfushorët në mbrojtje, por mendoj që duhet të kapim ritmin për të qenë sa më të gatshëm për finalet e Final 4”, deklaroi Tetova.

Ndeshje delikate është edhe ajo mes Vllaznisë dhe Dinamos, dy skuadra që po kalojnë moment të vështirë në kampionat.

Sa i përket mbijetesës, në Korçë dhe Durrës do të luhen dy finale, ku katër ekipe do të kërkojnë fitoren me çdo kusht, për të vazhduar luftën për të qëndruar në elitë.

Sfida tjetër është ajo mes Elbasanit dhe Bylisit, dy ekipe që gjithashtu e kanë detyrim fitoren. Verdheblutë janë 1 pikë larg Final Four, ndërsa ballshiotët rrezikojnë mbijetesën.

Të gjitha këto takime do të luhen në orën 15:30.