E fundit!

14:00 Politikë

Rama në "radar" ministren e Shëndetësisë

Kryeministri Edi Rama gjatë mbledhjes së grupit të PS dhe ...

Egnatia mposht Tiranën me vuajtje, portierët vendimtarë në Bylis-Dinamo

29 Nëntor 2025, 15:57, Sport CNA

Egnatia mposht Tiranën me vuajtje, portierët vendimtarë në

Egnatia regjistroi fitoren e dytë radhazi, pasi mposhti minimalisht Tiranën, në duelin e javës së 13-të në Superiore.

Sukses i rëndësishëm për rrogozhinasit, që rikthehen në krye të renditjes, së bashku me Elbasanin. Sfida në “Selman Stërmasi”, nisi me kampionët më kërkues. Flamur Ruçi gjeti golin e avantazhit në minutën e 10-të, por u anulua për pozicion jashtë loje.

Vetëm 3 minuta më vonë, Vera shpërdoroi një mundësi të artë, pasi me portën e boshatisur, goditi tranversën.

Në minutën e 24-t, Egnatia gjeti avantazhin. Meta shkaktoi penallti ndaj Albanezes, të cilën e ktheu në gol Bakajoko.

Reagimi i Tiranës ishte i menjëhershëm, me Fernandez, që nuk shënoi dot përballë portierit Dajsinani. Portieri ishte sërish vendimtar 3 minuta më vonë, me një tjetër pritje vendimtare.

Fraksioni i parë u mbyll me Tiranën në sulm, ndërsa me të njëjtën mënyrë nisi edhe e dyta. Zhunior u ndal nga Dajsinani, ndërsa Tabeku nuk kishte saktësinë e duhur.

Pjesa e dytë vazhdoi me dominimin e bardhebluve, që e kishin të pamundur të shënonin, kjo edhe për shkak të formës së shkëlqyer të treguar nga gardiani i rrogozhinasve.

Në fund, festa ishte për Egnatian, që ngjitet në vendin e dytë me 25 pikë, po aq sa Elbasani kryesues.

Tirana mbetet në vendin e fundit me vetëm shtatë pikë të grumbulluara dhe kjo është humbja e katërt në pesë ndeshjet e fundit.

Në duelin tjetër, Bylis dhe Dinamo barazuan pa gola mes tyre, në një duel spektakolar.

Mustafa dha shkëndijën e parë për ballshiotët, por tentativa e tij u ndal nga Teqja. Portieri i Dinamos e ndali sërish lojtarin e Bylisit edhe në minutën e 36-të, në një rast vetëm për vetëm.

Në fund të pjesës së parë, golit iu afrua edhe Dinamo, por Guindo u ndal nga Vashu. Portierët ishin vendimtare edhe në fraksionin e dytë.

Fillimisht Teqja ndali Peraltën, ndërsa Vashu i mohoi avantazhin Ferrukut. Në minutën e 80-të, Pergjoni ishte i pafat, pasi pa tentativën e tij të ndalej nga shtylla.

Me këtë barazim, Dinamo mbetet në vendin e pestë me 20 pikë, ndërsa Bylis renditet në vendin e tetë me 13 pikë.