Belgjika shkarkon trajnerin, një emër i njohur projektohet në stol

17 Janar 2025, 19:51, Sport CNA

Belgjika shkarkon trajnerin, një emër i njohur projektohet në

Belgjika ka shkarkuar trajnerin Domeniko Tedesco. Pas një periudhe të vështirë me rezultate zhgënjyese, Federata ka vendosur të ndajë rrugët me teknikun italian. Ky vendim, i cili ishte i parashikuar prej javësh, u bë zyrtar pas një takimi të shoqatës belge të futbollit. Lajmi erdhi pasi Tedesco mungoi në shortin për Kualifikueset e Kupës së Botës 2026, një sinjal i qartë që pozicioni i tij në krye të ekipit kombëtar ishte bërë i pasigurt.

39-vjeçari, i cili mori drejtimin e Belgjikës pas largimit të Roberto Martinez në fund të Kupës së Botës 2022, e nisi aventurën e tij në mënyrë të shkëlqyer. Kombëtarja nuk pësoi asnjë humbje në 13 ndeshjet e para nën drejtimin e tij, duke nxitur optimizëm se skuadra mund të kthehej në nivele të larta dhe konkurruese. Megjithatë, gjithçka nisi të shkojë në tatëpjetë pas një mosmarrëveshjeje të bujshme me portierin Thibaut Courtois, i cili refuzoi të luante për ekipin kombëtar për shkak të tensioneve me trajnerin. Ky incident shënoi fillimin e një periudhe të trazuar për ekipin belg.

Në fushën e lojës, Belgjika nuk arriti të përmbushte pritshmëritë. Pas eliminimit në fazën e 1/8-ave të Kampionatit Europian 2024, skuadra performoi dobët edhe në Ligën e Kombeve, duke përfunduar në vendin e tretë të grupit dhe duke regjistruar vetëm një fitore nga gjashtë ndeshje. Humbja ndaj Izraelit në nëntor, e cila vulosi një tjetër zhgënjim në Ligën e Kombeve, ishte pika e fundit që detyroi federatën belge të marrë vendimin përfundimtar për largimin e Tedesco-s.

Në total, në 10 ndeshjet e fundit të tij, Belgjika arriti vetëm dy fitore, duke shfaqur mungesë konsistence dhe një lojë larg standardeve të larta që kombëtarja kishte arritur në të kaluarën.

Mediat belge fillojnë të spekulojnë për emrin e pasardhësit të tij dhe një nga opsionet më të përfolura është rikthimi i Thierry Henry, i cili ka shërbyer më parë si asistent i Roberto Martinez. Henry është parë si një figurë që mund të frymëzojë skuadrën dhe të rikthejë entuziazmin te lojtarët. Megjithatë, federata nuk ka bërë ende asnjë njoftim zyrtar për emrin e ri që do të marrë drejtimin e ekipit kombëtar.