E fundit!

14:09 Aktualitet

Të dehur dhe me shpejtësi skëterrë/ Kërcasin gjobat, mijëra masa për shoferët

Gjatë 24 orëve të fundit, shërbimet e Policisë Rrugore në ...

Fermerët e Shkodrës: Nuk kemi certifikatat e pronësisë

7 Gusht 2025, 14:25, Sociale CNA

Shumë prej fermerëve nuk mund të bëhen pjesë e përfitimeve të skemave kombëtare të Ministrisë së Bujqësisë për shkak se u mungon certifikata e pronësisë. Edhe pse janë miratuar pesë vite më parë procedurat për pajisjen me aktin e marrjes së tokës bujqësore në përdorim ky proces mbetet i papërmbyllur për mijëra fermerë.

Fermerët kërkojnë nga institucionet thjeshtim të dokumentacioneve, por edhe vëmendje drejt pajisjes me certifikata pronësie.

“Mungesa e certifikatave të pronësisë është një problem i madh për ne. Kush nuk e ka pronësinë nuk mund të përfitojë dhe kjo është shqetësuese. Është e domosdoshme që shteti të gjejë një zgjidhje për këtë problem që vijon prej vitesh dhe na penalizon”, tha fermeri.

“Unë kam tokë me qira, por për një pjesë e asaj toke nuk ka dokument pronësie dhe në këtë mënyrë nuk mund të përfitoj plotësisht dhe kjo më penalizon shumë. Një problem tjetër janë edhe çmimet e ulëta në treg. Ne lodhemi dhe punojmë shumë e më pas duhet t’i shesim me çmime shumë të ulëta. Edhe treg të organizuar nuk ka, duhet që ta sigurojmë vetë tregun”, u shpreh një tjetër fermer.

Për drejtuesit vendorë të bashkive në Qarkun Shkodër mungesa e dokumenteve të pronësisë është një çështje që kërkon zgjidhje sepse penalizon padrejtësisht fermerët…

“Është një shqetësim i madh mungesa e certifikatave të pronësisë. Është një problem i vjetër që nuk po gjen zgjidhje. Ne e kemi adresuar prej kohësh dhe tashmë qeveria duhet që të gjejë një zgjidhje për këtë çështje. Fermerët në Pukë më shumë kanë përfituar nga shoqata të ndryshme sesa nga investimet që jep qeveria për fermerët për shkak se nuk kanë pronësinë. Duhet të zgjidhet”, deklaroi zëvendëskryetari i Bashkisë Pukë.

“Edhe për Vaun e Dejës mungesa e pronësisë është problem i madh. Në shumë fshatra atje fermerët janë shumë punëtorë, por nuk kanë dokumentet e pronësisë disa prej tyre, gjë që u sjell vështirësi sepse nuk mund të përfitojnë. Qeveria duhet që t’i japë një zgjidhje përmes hipotekave në mënyrë që më pas fermerët të zhvillohen si duhet dhe të përfitojnë”, tha përgjegjësi i Bujqësisë në Bashkinë Vau i Dejës.

Mungesa e certifikatave të pronësisë është një problem i trashëguar ndër vite e që fermerët i penalizon për përfitimin e subvencioneve, por edhe zgjerimin e aktivitetit të tyre.

Në nivel qarku, mbi 15 mijë fermerë në Shkodër nuk janë përfshirë në skemat e subvencioneve, për shkak të mungesës së AMTP apo të certifikatës së pronësisë, dokumente që mbeten kusht i domosdoshëm për të përfituar ndihmën financiare nga shteti./ CNA