21 Tetori, Dita Kombëtare e Depistimeve/ Shkodra vishet rozë në marshimin sensibilizues

21 Tetor 2025, 13:54, Sociale CNA

21 Tetori, Dita Kombëtare e Depistimeve/ Shkodra vishet rozë në

Sot Shkodra u vesh me ngjyrën rozë. Mes solidaritetit dhe mesazheve mbi jetën, u zhvillua marshimi rozë, një nismë që çdo tetor mbledh gra, vajza, mjekë dhe qytetarë në një qëllim të përbashkët, ndërgjegjësimin për parandalimin e kancerit të gjirit.

Në përfundim të marshimit, një tabelë simbolike u vendos pranë njërit prej semaforëve kryesorë të qytetit, aty ku të gjithë ndalemi për të pritur dritën jeshile. “Një kujtesë për ty: Shëndeti yt është prioriteti yt gjithë vitin!” Ky ishte mesazhi që tashmë do të shoqërojë çdo kalimtar, për të mos e lënë kujdesin ndaj vetes për nesër.

"Në vazhdën e aktiviteteve që zhvillojmë gjatë muajit tetor, sot është marshimi rozë. Qyteti vishet me ngjyrën e shpresës, forcës e guximit. Sot bëmë inaugurimin e tabelës, e cila do të qëndrojë aty gjatë gjithë vitit. Pikërisht në vendin ku të gjithë ndalen. Tashmë jeta është e shpejtë, këtu të gjithë ndalemi për të pritur dritën jeshile. Ndaj duhet ndalur, reflektuar dhe kujdesur për shëndetin. Çdo vit ka raste në rritje, por kemi edhe raste suksesi dhe kjo na gëzon", tha shefja e shërbimit parësor, Megi Bilali.

Rastet e prekura me kancer janë në rritje, por edhe rastet e fitimit të kësaj beteje po ashtu janë të shumta. Infermierja Brixhilda Curri, tregon mbi sfidën e saj tashmë të fituar me kancerin e gjirit.

“Në 2023 jam përballur me kancerin e gjirit. Një betejë që sot flas lirshëm pasi e kam fituar. Një kalvar vuajtjesh e sfidash, por që afër kam pasur familjen. U bëj thirrje të gjitha grave e vajzave që të bëjmë kontrolle të gjirit. Unë e zbulova nga një dhimbje që pata. Operacioni, kimioterapitë, rënia e flokëve, të gjitha janë sfidë më vete. Por forcën e gjeta te fëmijët. Pranimi i sëmundjes ishte i vështirë, por mendimi te fëmijët dhe Zoti e luftova”, u shpreh Brixhilda Curri.

21 tetori shënon ditën kombëtare të depistimit, ky është muaji i ndërgjegjësimit, por mesazhi për kontrolle mbetet i vlefshëm çdo ditë të vitit. Në Shkodër këtë vit janë zbuluar 28 raste të reja me kancer gjiri./CNA