Klubi i budallenjve

18 Maj 2025, 13:37, Satire CNA

Klubi i budallenjve

Politika ka prodhuar njerëz të korruptuar, ka prodhuar individë që i kemi quajtur budallenj, kemi parë qesharakë në parlament të dalë nga lista e partive politike.

Patjetër ka njerëz me integritet, shtetarë, burra e gra me vlera, por ka prodhuar dhe klube budallenjsh.

Këto jo vetëm në Tiranë. Një simbolikë të tillë e gjen në Korçë.

Është një klub diku në bulevard “Republika” që mund të quhet politikisht klubi i budallenjve.

Klubi i budallenjve sepse atje shkojnë të gjithë ata që mendojnë se, një biznesmen i fantaksur mundet të të bëjë udhëheqës, mundet të të bëjë kryetar bashkie, mundet të të bëjë deputet, mundet të të bëjë deputete.

Dikur i pari që shkoi, pretendoi të ishte udhëheqës i bashkisë së Korçës. Por pasi shkoi të hidhte themelet e klubit, rrugës harroi dhe shkoi diku jashtë dhe doli kundër vendit të tij.

Shkoi dëshmitar kundër Shqipërisë. Ishte i pari i klubit të budallenjve.

Mendonte se, ai ishte udhëheqës i padiskutueshëm.

Në fillim njerëzit e pyesnin nga i buronin këto ide por më pas e kuptuan se klubi i budallenjve kishte filluar të merrte formë. Dikush po e çmendte.

I dyti që shkoi, ishte një prefekt që njëherë pretendonte bashkinë, pastaj të bëhej deputet.

Edhe ky iu bashkua klubit të budallenjve duke takuar atje dhe ndonjë drejtoruc të zhgënjyer të pushtetit me idenë se e ardhmja do ishte e ndritur.

Së fundi, klubit të budallenjve iu bashkua edhe grupimi Marksit, Engelsit, Leninit apo Stalinit me shpresën se ardhmja do të ishte e ndritur, parlamenti do shkëlqente.

Klubit të budallenjve iu shtua edhe një zonjë.

Janë bërë shumë në klubin e budallenjve në bulevardin e Korçës, ku biznesmeni i mbledh, iu jep leksione filozofie, politike, psikologjie dhe ata të mahnitur besojnë dhe shpresojnë se e ardhmja do jetë edhe më e ndritur por harrojnë se thjesht dhe vetëm se janë mbledhur në një klub budallenjsh.

Kanë të gjithë të drejtën të mendojnë se asgjë nuk do të ndryshojë, janë ata dhe vetëm ata.

Nuk e ka thënë kot Churchill : “Vetëm i vdekuri dhe budallai nuk ndryshojnë”

Dhe, te klubi i budallenjve askush nuk ndryshon. Të gjithë besojnë se janë udhëheqës të ndritur jo vetëm të popullit të Korçës por dhe të kombit shqiptar./ CNA