The Guitar Shop/ Korça e serenatave, me dyqanin e vetëm të kitarave

26 Dhjetor 2023, 22:45, Qyteti im CNA

The Guitar Shop/ Korça e serenatave, me dyqanin e vetëm të

Genci Llapanji

Qytetit të serenatave i mungonte një dyqan i mirëfilltë i kitarës, instrumentit më identifikues të të gjithë serenatistëve. Në zonën e Pazarit të Vjetër të Korçës, tashmë është bërë realitet krijimi i një dyqani kitarash, që do të sjellë jo vetëm shitjen e këtij instrumenti, por edhe kurse për fëmijët dhe të apasionuarit e kitarës.

Në dyqan gjejmë muzikantin Genci Llapanji, i cili me shumë kënaqësi na ka treguar rreth vetes së tij por edhe projektit të realizuar tashmë në Korçë.

Genci tregon se prej shumë vitesh ka jetuar në Greqi, po ashtu ka vizituar shumë vende të tjera për tu njohur me kulturën, ndërsa u rikthye në Shqipëri për të vazhduar karrierën e tij artistike, pasi kitara është pjesë e pandarë e tij.

"Lidhja ime me muzikën është që në vitet e fëmijërisë, që 11 vjeç, kam qenë në shkollë të muzikës. Shumë shpejt e kam ushtruar kitarën, më merrnin nëpër dasma dhe këndonim e me shoqërinë. Kurbeti na detyroi të largohemi rreth 18 vjeç, dhe në 12 vitet e fundit nga 1999 deri 2012 kam jetuar në Greqi. Kam marrë pjesë në audicionet e X Factor në Athinë, u integrova në muzikën greke. Ne si familje jemi muzikantë, jemi 5 vëllezër. Kurse mua më ka rrëmbyer, dhe kitarën e kam quajtur dashnore e përjetshme. Kam dashur ta largoj dhe ajo nuk më largohet.", tha Genci.

Genci tregon se si lindi ideja për të hapur një dyqan kitarash, jo thjesht si një objekt por me shumë qëllime në vetvete.

"Ideja e parë ka qenë e mikut dhe kolegut tim Shkëlqim Dule, i cili është kitarist shumë i mirë. Kemi patur shumë adhurues që donin të mësonin kitarën dhe afroheshin, dhe këtë ide patëm për të hapur edhe kurse. E theksoj se edhe në Greqi u kam dhënë mësim 2-3 djemve të vegjël grekë dhe janë bërë kitarista të mirë. Kitara është dashuri. Dhe tërheq shumë adhurues që duan ta mësojnë, pavarësisht se varet nga talenti që të jep zoti. Prandaj vazhdon edhe tregtia e kitarave, nuk i blejnë vetëm ata që iu duhen për punë, por edhe një njeri që nuk i bie kitarës por ka 5 kitara në shtëpi. Për shembull unë kam 7 kitara të miat, ndërsa një shoku im që nuk i bie ka 12.", tregoi ai.

Ndonëse një dyqan i vogël, sërish mbart vlera shumë të mëdha sa i përket këtij instrumenti. Lloje të ndryshme kitarash, nga të gjitha markat i gjejmë pikërisht në "The guitar shop".

"Në dyqani jonë do të gjejnë kitara të përdorura, kitara të reja, marka të shtrenjta, prodhime japoneze e kineze shumë të mira. Gjithashtu gjejnë çifteli, riparime kitarash, servise të plota që i bëj unë dhe objektivi është të hapim kursin e kitarave. Kemi patur shumë kërkesa nga prindër, më tepër vajza që kanë shumë dëshirë dhe më pyesin kur do hapen kurset.", u shpreh ai.

Interesi i lartë i fëmijëve, po ashtu edhe i prindërve siç tregon Genci, na sjell ndërmend edhe pyetjen e rradhës, sa e vështirë është ta mësosh një kitarë?

"Që në momentin që ke talent dhe vullnet, kitara mësohet. Nëse nuk ke talent, spo them që nuk e mëson, por me vullnet arrin deri diku. Të paktën të mësosh të këndosh në ambjente familjare, me shoqërinë, për djemtë është shumë e këshilluar sepse si traditë e vjetër korçarë iu afrohen edhe vajzat.", thotë Genci.

Interesant mbetet fakti se shumë turistë afrohen pranë dyqanit, dhe bëhen bashkë me Gencin jo vetëm në diskutim për kitarat që ndodhen aty, por edhe në duete muzikore. Dy janë kujtimet e veçanta qe Genci ka zgjedhur të tregojë për Cna Tv.

"Më ka bërë çudi në fakt, kam jetuar jashtë shtetit dhe i kam parë të huajt, por në këtë dyqan janë afruar edhe njerëz që nuk kanë luajtur ndonjëherë në kitarë, madje i njohin edhe markat e mira. Kam luajtur me një këngëtare çeke, luante bluzz, ishte diçka e momentit, dhe emocionet janë të pakthyeshme. Ferki Shala, ylli i rockut shqiptar vjen një ditë në dyqan. Fatkeqësisht unë nuk e njihja dhe kemi kënduar një këngë të tij "Moj bjondinë më synë e zi". Jemi dhe miq tashmë dhe shpresoj që do të bëjmë edhe një duet.", rrëfeu ndër të tjera Genci.

Vitet që Genci ka jetuar në shtetin grek kanë bërë që ky i fundit të jetë më tepër i lidhur me muzikën greke. Ja çfarë thotë ai kur e pyesim se cilën muzikë do të zgjidhte, atë greke apo serenatën korçare.

"Si i kthyer nga Greqia dhe me integrimin që pësova atje, mendoj se anoj më shumë nga kënga greke. Por serenata korçare dhe me këngët e Horizontit Blu janë vërtët shumë të bukura. Për ju do këndoj një këngë të këtij grupi, një kënge greke e pse jo edhe një spanjolle.", tha ai.

Mikpritja e korçarit Llapanji ka qenë fantastike për kohën që kemi kaluar së bashku në dyqanin e kitarave. Vetë Genci ka zgjedhur të luajë në një prej kitarave të dyqanit, duke na mahnitur me serenatat, këngët greke por edhe ato spanjolle. Dyqani The guitar shop ndodhet në Pazarin e Vjetër të Korçës. Për të gjithë të apasionuarit pas muzikës, qoftë edhe për të interesuarit që duan të mësojnë më tepër për kitarën, CNA ju vendos në dispozicion numrin e kontaktit 069 344 1104./ CNA