Pocesti, fshati i Dibrës që ndryshoi vetveten dhe po tërheq turistët

10 Janar 2025, 07:22, Qyteti im CNA

Pocesti, fshati i Dibrës që ndryshoi vetveten dhe po tërheq

Pocesti, një nga fshatrat më të mëdhenj të Dibrës, pjesë e Maqellarës, deri vitin e kaluar ishte njësoj si katundet e tjera të vendit që vuajnë largimin e të rinjve, infrastrukturën e dobët dhe mungesën shërbimeve. Sot Pocesti ka ndryshuar tërësisht vetveten falë një nisme që morën djemtë e larguar nga fshati.

Fillimisht u nisën nga nevoja për të riparuar disi rrugën që lidhte fshatin me aksin rajonal, por gatishmëria e komunitetit për t'u përfshirë ishte aq e madhe sa tani të gjitha rrugicat dhe sheshet janë shtruar me kontributin e vetë banorëve, duke e shndërruar atë një model që po tërheq vëmendjen e turistëve dhe mund shërbejë si një shembull i mirë edhe për rajone të tjera.

“Shqipëria nuk ndryshon pa ndryshuar më parë veten, më pas familjen dhe më pas komunitetin ku jeton ”, shpjegoi për "Monitor" nisma “Djemtë e Pocestit”. Të larguar gati dy dekada më parë në emigracion, pasi përmirësuan ekonominë e tyre dhe të familjes ata nuk ndiheshin mirë kur ktheheshin për pushime. Balta dhe rrugicat e prishura nuk i shkonin për shtat një tradite të vjetër të dibranëve të Maqellarës për rregullin dhe pastërtinë në fshat.

Që nga 1 korriku 2024 deri në fund të vitit me rreth 150 mijë euro të grumbulluara “Djemtë e Pocestit” shtruan me beton e pllaka disa kilometra rrugica e sheshe dhe rregulluan rrugën hyrëse për në fshat. Projektet po vazhdojnë me investime të tjera dhe pa asnjë mbështetje financiare nga pushteti vendor dhe ai qendror.

“U mblodhëm në maj të vitit 2023 dhe filluam disa kuvendime të vogla me moshataret tanë, duke diskutuar se kush kanë qenë dibranët më parë, një ndërthurje e penës me pushkën. Po ne ku jemi sot! Këtu ngecte gjithmonë biseda. Pas një pritjeje 100-vjeçare për sistemimin e rrugëve, ndihma nuk erdhi kurrë. U mblodhën ne të rinjtë dhe vendosëm të vetëquhemi “DJEMTË E POCESTIT”. Dhe kështu vazhduam. Bëmë projektin vetëm pa ndihmën e askujt, bëme planin, vazhduam matjet, nxorëm një vlerë se sa mund të kushtonte”, shpjeguan “Djemtë e Pocestit”.

Shpallja për mbledhjen e kontributeve nisi me 1 korrik 2024 dhe i parashikuar të zgjaste deri me 12 gusht. Kontribuuesit e parë ishin djemtë e Pocestit. Fillimisht ishin mosbesues pasi nuk kishte përvoja të mëparshme.

Javët e para kontributet vazhduan ngadalë, por ditë pas dite po shtoheshin të rinj, derisa arriti një fazë që donacionet u shpeshtuan. U mblodhën gjithsej 150 mijë euro, nga të cilat rreth 30 mijë euro u përdoren për të shtruar rrugën lidhëse të fshatit dhe pjesa tjetër për rrugicat dhe sheshet brenda fshatit.

Gjithashtu u ndërtua një bibliotekë, u mbollën pemë u vunë tabela. Gjatë verës do të ndërtohen edhe disa rrugë të tjera të tjera në fshat. Tani Pocesti, një nga fshatrat më të mëdhenj me 800 banorë rezidentë, është ndoshta i vetmi në vend që me kontributin e banorëve ka ndryshuar tërësisht vetveten dhe tashmë po marketohet si një nga fshatrat më të bukur të vendit. Zona e Maqellarës është me traditë dhe një zonë arsimdashëse dhe një model i bashkëpunimit në komunitet.

Rivitalizimi i infrastrukturës së fshatit është një leksion që banorët i dhanë pushtetit lokal dhe atij qendror se me pak lekë bëhen shumë punë. Vetëm me 150 mijë euro, ku janë paguar materialet e ndërtimit dhe ustallarët janë ndërtuara disa kilometra rrugica (shiko fotot më poshtë).

Nisma ishte një model i transparencës ku “Djemtë e Pocestit” bënë projektet dhe zbardhën çdo faturë blerjesh para donatorëve.

Pocesti mund të jetë një shembull shumë i mirë për qindra fshatra të vendit të cilat me vetorganizim mund të përmirësojnë infrastrukturën dhe jetën komunitare dhe për rrjedhojë edhe nivelin ekonomik./ Revista Monitor