Maliqi çel sezonin turistik me panairin e organizuar për herë të parë në fshatin Kolanec

31 Maj 2025, 15:32, Qyteti im CNA

Maliqi çel sezonin turistik me panairin e organizuar për herë

Në fshatin piktoresk të Kolanecit në Bashkinë e Maliqit, është zhvilluar për herë të parë një panair tradicional, duke shënuar kështu hapjen zyrtare të sezonit turistik në këtë zonë. Banorët, të rinj e të moshuar, janë bërë bashkë në një ditë feste e gëzimi, ku tradita dhe kultura u sollën në vëmendje përmes ushqimeve bio, këngëve, valleve dhe mikpritjes karakteristike të zonës.

Organizatorja e këtij aktiviteti, Brizida Gjikondi, ka theksuar rëndësinë e këtij panairi si pjesë e një vizioni më të gjerë për zhvilimin e zonës malore të Bashkisë Maliq, me qëllim kthimin e saj në një destinacion turistik bashkëkohor. Për Gjikondin, në këtë ditë flitet për paqe, për dashuri e për harmoni mes njerëzve ndërsa shprehet optimiste se do të kthehet në traditë për Kolanecin.

"Qëllimi është rivitalizimi i të gjithë zonës së Maliqit. Kjo është kryesore, sidomos për zonën malore të kësaj bashkie, Kolaneci dhe pjesa tjetër e Gorës. Mendoj që fshati Kolanec tani nuk do të flasë më me luftën e të shkuarën, por do të flasë me turizmin dhe do të jetë një vend turistik bashkëkohor. Për hir të së vërtetës, nga Bashkia Maliq dhe kryetari Gëzim Topçiu patëm një mbështetje maksimale për çdo gjë, nga më e vogla te më e madhja. Kjo është një ditë që flet për paqen, për dashurinë, për harmoninë mes gjithë njerëzve dhe besoj se do të bëhet një traditë që në fund maji e fillim qershori do të flasë për Kolanecin dhe për Maliqin", u shpeh Gjikondi.

Në këtë nismë është përfshirë edhe Bashkia Maliq, e cila ka mbështetur aktivitetin e organizuar për herë të parë në këtë zonë. Në fjalën e tij, kryebashkiaku Gëzim Topçiu ka treguar se Kolaneci është një nga fshatrat më të bukur prej natyrës, por edhe traditës e historisë.

Topçiu thekson një nga investimet më të rëndësishme të zonës në shtrimin e rrugës kryesore që do të sjellë rikthimin e të larguarve në këtë fshat e sigurisht do ta kthejë në një atraksion turistik.

"Jemi në një nga fshatrat më të bukur të Bashkisë Maliq, jo vetëm për bukuritë e natyrës, por edhe për traditën e historinë. E meritonte fshati Kolanec këtë organizim që do të jetë traditë për të gjitha vitet. Bashkia Maliq sapo ka filluar investimin për rrugën e fshatit që do të zgjatet brenda këtij viti me 1 km për të bërë të mundur që hap pas hapi ne të realizojmë një nga investimet më të dëshirueshme për ta kthyer këtë fshat në një atraksion turistik. Le të jetë ky një fillim i mbarë, do t'i falënderoja të gjitha amvisat e Kolanecit që sot kanë përgatitur produktet e tyre bio tradicionale të kësaj zone. Besoj që vitin tjetër do të ketë më shumë njerëz, do të jetë më bukur se sot falë edhe mbështetjes që do të ketë vetë bashkia për këtë fshat", tha kryebashkiaku.

Një prej zonjave të moshuara të fshatit Kolanec, mes emocionesh dhe shumë krenare për këtë aktivitet, ndan me shikuesit ndjesitë e saj për këtë ditë të veçantë.

"Ky është panairi i parë dhe i gjithë fshati është ngritur në këmbë për ta shijuar e gëzuar këtë ditë të sotme. Mosha e tretë që ka mbetur e ndien më shumë sesa të rinjtë se ata kanë ikur sa andej sa këtej, por edhe ata do të vijnë. Ata që janë nga fshati e kanë vajtur në Tiranë e ngado, na kanë marrë në telefon për këto organizime që bëhen pavarësisht se këtë radhë nuk jemi të përgatitur, por herët e tjera do ta bëjmë aq mirë, sa nuk e keni idenë. Ne të fshatit jemi shumë të kënaqur", tha banorja.

Kolaneci ka dhënë kështu sinjalin e parë të një rilindjeje turistike, ku tradita takohet me zhvillimin dhe bashkëpunimin lokal. Një fillim i mbarë për një të ardhme plot shpresë për banorët e zonës dhe për gjithë rajonin e Maliqit./ CNA