web counter
LEXO PA REKLAMA!

SHKARKO APP

App Store
Google Play

Vrasja e Egli Progës/ Rama, akuza prokurores: Bëri politikë, jo hetim të drejtë

8 Shtator 2024, 11:40, Politikë CNA
Vrasja e Egli Progës/ Rama, akuza prokurores: Bëri politikë, jo
Kryeministri Edi Rama

Kryeministri Edi Rama, në Asamblenë e PS-së përmendi vrasjen e Egli Progës në Pogradec, ku tha se rasti është interpretuar në forma të ndryshme.

Rama sulmoi mediat dhe opozitën për trajtimin e kësaj vrasjeje, ndërsa nuk kurseu as prokuroren e Korçës që ndryshoi akuzën nga vrasje me dashje në vrasje nga pakujdesia.

Sipas tij, prokurorja bëri politikë dhe jo hetim të drejtë e të pavarur.

"U mobilizuan ta përdorin vrasjen e një djali të ri si overdozë helmi për të nxitur urrejtjen ndaj nesh. U prodhua një film i kronikës së zezë ku u mblodhën bashkë të tëra të këqijat e mundshme. Komunikata e policisë u hodh në cepat e lajmeve dhe komenteve mediatike, që i dominoi fantazia kriminale e gënjeshtarëve dhe gjuha ekstremiste e spekulantëve. U tha me të madhe se vrasja kishte ardhur për një gjobë të papaguar, për të cilën viktima u vra nga një bandë gjobitësish. Gënjeshtër. U shkrua që Pogradeci qenka bërë si qeli e viteve ‘80 ku ligjin e bëkan bandat e gjobëvënësve, gënjeshtër. U vu kuja se policia kishte tentuar ta fshihte krimin, gënjeshtër. Shpejtësia e veprimeve të policisë në ndalimin e autorit është e dokumentuar. U bërtit se ambulanca kishte ardhur me 40 minuta vonesë, gënjeshtër. Koha e mbërritjes është e dokumentuar në sistem. U përhap se autori i krimit kishte mbrojtje politike, ngaqë një dajë i tij ishte eksponent i lartë i PS në Pogradec. Gënjeshtër.

PS nuk mbron politikisht as ministrat e saj, por në rastin konkret ai dajë që ka qenë dikur pjesë e PS është një person më pas i dënuar për abuzim me detyrën dhe s’ka asnjë lidhje me PS-në, i ndjeri ishte anëtar me tester i PS dhe nuk ishte pronar i lokalit ku ndodhi vrasja, po punonjës i OSSHE. Derisa e vërteta të vishte pantallonat gënjeshtra me 7 gishta e bëri 7 herë xhiron e vendit. Një prokuror i paaftë dhe i papërgjegjshëm që pa kryer asnjë hetim e ndryshoi akuzën si vrasje me dashje në vrasje nga pakujdesia, duke revoltuar të madh e të vogël. Kështu popullit iu dha pa pikë turpi doza e helmit për të bërë politikë me një vdekje tragjike, deri dikur organizuar një protestë mashtrues e kundër qeverisë, ndërkohë që çështja ishte dorëzuar korrektësisht nga policia që në orët e para pas ngjarjes. Për të larë ujin e trashë me të hollë, prokuroria shkoi e mori të pandehur një polic patrulle duke treguar se as nuk e ka haberin e rolit të policisë së patrullës, duke bërë politikë në vend se të bënte hetim të drejtë, të paanshëm, të pavarur dhe sa më të shpejtë. Kjo nuk është as e para e as e fundit, lojë politike e mediatike, ku e vërteta bykoset brenda çorapit të pistë", theksoi kreu i qeverisë./ CNA





Lajmet e fundit nga