TEC-i i Vlorës/ Balluku: Do të vendoset në punë, lajmet për shkatërrimin janë të rreme

6 Mars 2024, 13:16, Politikë CNA

TEC-i i Vlorës/ Balluku: Do të vendoset në punë, lajmet

Zv.kryeministrja dhe ministrja e Infrastrukturës, Belinda Balluku

Zv.kryeministrja dhe ministrja e Infrastrukturës, Belinda Balluku, reagoi në lidhje me lajmet e qarkulluara në media se TEC-i i Vlorës është dëmtuar në mënyrë të pakthyeshme nga një stuhi e fuqishme në vitin 2012.

Balluku përgënjeshtroi një lajm të tillë teksa tha se asnjëherë nuk ka pasur cuname në brigjet e Vlorës që të shkatërrojnë TEC-in.

Ajo e cilësoi këtë shkrim si një raportim për të mbuluar gabimet e së shkruarës, teksa hodhi akuza ndaj qeverisë Berisha për ndërtimin gabim të sistemit të ftohjes.

Zv.kryeministrja theksoi se TEC-i i Vlorës nuk ka punuar asnjë ditë dhe shteti shqiptar ka qenë i detyruar që të paguajë një kredi të marrë nga gabimi i qeverisë Berisha.

“Qeveria ka në plan të vërë në punë TEC-in e Vlorës, është diçka që e kemi bërë publike prej dy vitesh. Unë kam punuar në mënyrë intensive edhe me bashkëpunëtorët tanë që është “Accelerate Power”, një kompani amerikane. E kemi diskutuar disa herë këtë çështje, por duhet të kuptoni se TEC-i i Vlorës është ndërtuar… se kam lexuar dhe një shkrim dje që për të thënë të drejtën nëse bëhen shkrime investigative që mundohen të justifikojnë gabimet e së shkuarës nuk do të quhen më investigative.

Keni parasysh se shkrimi dje thoshte se një stuhi e tmerrshme në vitin 2012 që ne e njohim cila është shkalla e stuhive në Republikën e Shqipërisë, ka arritur që të prishë TEC-in e Vlorës njëherë e përgjithmonë akoma pa u ndezur. Kjo nuk është e vërtetë dhe ëhstë katërcipërisht e vërtetuar se TEC-i i Vlorës është ndërtuar gabim.

Në vitin 2010, projektimi i sistemit të ftohjes ka qenë i projektuar dhe i ndërtuar gabim, kështu që kur një TEC ndërtohet dhe brigjet e Vlorës nuk njihen më për cuname që e paskan shkatërruar TEC-in dhe nuk u bë më që të ndizej, ndërkohë që nuk ishte ndezur asnjë ditë deri në ditën e cunamit, që nuk e kuptoj nga ka dalë në sipërfaqe se nuk e kishim dëgjuar deri më sot.

TEC-i i Vlorës nuk ka punuar asnjë ditë dhe shteti shqiptar ka qenë i detyruar që të paguajë një kredi të marrë dhe kurrë nuk është dhënë një përgjigje zyrtare pse është projektuar gabim ai TEC. Ne mësojmë nga gabimet e qeverive të shkuara, mësojmë nga problematikat e pafundme që kemi gjetur në sektorin energjetik. Nuk ka nevojë që t’jua kujtoj sa herë që flasim bashkë 45 % humbje të prodhimit të një produkti të çmuar siç është energjia. Kështu që për të mos përsëritur gabimet, ne kemi 2 vjet që punojmë me “Accelerate Power” dhe me konsorciumin, i cili do të marrë përsipër rindezjen e TEC-it të Vlorës, por jo në kapacitetet që ai ka sot.

Kapacitetet e projektuara dhe kurrë të vëna në funksion në vitin 2012, kanë qenë 110 mega, ndërkohë që TEC-i i Vlorës po projektohet për 3 module, 100 mega i pari, 150 i dyti dhe 100 i treti, pra 350 mega në total.

Do t’u bëj thirrje të gjithë gazetarëve të quajtur investigativë që ta rishikojnë edhe njëherë këtë punën e cunamit se me të vërtetë dje në Ministrinë e Energjisë jemi shokuar nga ky fakt i ri që kërkon të mbulojë me ujin e detit të Vlorës një zullum shumë të madh”, theksoi zv.kryeministrja./ CNA