Rritja e numrit të rasteve të dhunës ndaj grave dhe vajzave/ Berisha, akuza qeverisë

24 Nëntor 2024, 10:48, Politikë CNA

Rritja e numrit të rasteve të dhunës ndaj grave dhe vajzave/

Kreu i Partisë Demokratike, Sali Berisha, ka folur në “Konferencën/Pjesëmarrjen e Suksesshme në Proceset Politike dhe Fitoren në Zgjedhje” ku ka deklaruar se vitet e qeverisjes së socialistëve “de facto” narkosocialiste kanë qenë vite të regresit.

Berisha ka theksuar se sot janë rritur rastet e dhunës ndaj grave apo hendeku mes barazisë gjinore.

Lideri i opozitës gishtin e akuzës ia drejtoi qeverisë duke thënë se nuk kanë ngritur zërin për mbrojtjen e të drejtave të njeriut dhe ndaj grave, madje nuk kanë prezantuar asnjë rezolutë të vetme në mbrojtje të të drejtave të grave.

“Beteja juaj për afirmimin gjithnjë e më të madh të rolit tuaj përcaktues në shoqëri dhe në vend është një betejë e vështirë, është një betejë që përballet me murin mijëravjeçarë të patriarkisë i cili sot është dhunuesi më kryesor i lirive dhe të drejtave të njeriut në Shqipëri, në Evropë dhe në botë.

Beteja për rrëzimin e tij është një nga betejat më të rëndësishme për emancipimin njerëzor dhe ju me përpjekjet tuaja jepni një kontribut shumë të çmuar.

Vitet e qeverisjes së socialistëve de facto narkosocialiste kanë qenë vite të regresit.

Është fakt i pamohueshëm se nëse u arrit që diskriminimi financiar të marrë një goditje të mirë dhe hendeku financiar i pagave mes burrave dhe grave të zbresë në vitin 2013, pas vitit 2013 ky hendek u thellua pa ndërprerë dhe sot ka shkuar aty ku kemi qenë.

Po kështu dhuna ndaj grave ka njohur një rritje të papranueshme. Në këto 10 vjet janë vrarë 160 gra nga të cilat një pjesë e mirë nën mbrojtje ligjore, kurse aktet e dhunës janë rritur me mbi 50%.

Nëse ndiqni diskursin e përditshëm fjala grua, dhunë ndaj saj, barazi e saj me burrin, luftë kundër diskriminimit janë zhdukur nga fjalori i qeveritarëve dhe ministrave të Shqipërisë. Zëri i tyre mungon në çdo rast ku duhet të jenë avokate kryesore të mbrojtjes së të drejtave të njeriut. Zëri i tyre mungon dhe në rastet e dhunës ekstreme ndaj grave.

Nuk kanë sjellë një rezolutë për të mbrojtur të drejtat e grave”, tha Berisha./ CNA