“Rama të zbatojë ligjin”/ Këshilltarët e PD-së në Bashkinë e Tiranës kërkojnë shkarkimin e Veliajt

26 Shkurt 2025, 12:28, Politikë CNA

“Rama të zbatojë ligjin”/ Këshilltarët e

Këshilltarët e Partisë Demokratike në Bashkinë e Tiranës kanë kërkuar shkarkimin e Erion Veliajt.

Kryetari i këshilltarëve të Partisë Demokratike në Bashkinë e Tiranës, Ilir Alimehmeti, gjatë një konference deklaroi se kërkojnë mocion me debat për shkarkimin e Veliajt, i cili prej datës 10 shkurt ndodhet në burgun e Durrësit.

Alimehmeti tha se është fakt që Veliaj ndodhet në paraburgimin e Durrësit vetëm për një pjesë të dëmeve që u ka shkaktuar qytetarëve të Tiranës.

Alimehmeti shtoi se Rama duhet të zbatojë ligjin dhe të shkarkojë menjëherë Veliajn, duke u hapur rrugë procedurave ligjore.

"Jemi sot në një situatë ku Bashkia e Tiranës e ka kryebashkiakun në burgun e Durrësit prej datës 10 shkurt dhe Këshilli Bashkiak ka sot një mbledhje rutinë, jo me ugjencën e nevojitur të rastit, ku ne kemi bërë kërkesat tona të qarta për ndryshimet e rendit të ditës në pikat e mëposhtme.

E dimë shumë mirë dhe është fakt që Veliaj ndodhet në paraburgimin e Durrësit vetëm për një pjesë të dëmeve që i ka shkaktuar qytetarëve të Tiranës dhe ne kemi kërkuar shkarkimin nga detyra të tij.

Duke marrë parasysh të gjitha skandalet hetimet dhe abuzimet me miliona euro të Bashkisë Tiranë, kujtoj këtu rastin e inceneratorit inekzistent, apo përfitimin e fondeve të bashkisë përmes skemës '5D', si dhe tjetërsimin e fondeve të bashkisë për përfitim personal.

Është gjithashtu fakt se Rama pas lotëve të krokodilit uzurpoi Bashkinë e Tiranës dhe ky është një veprim antikushtetues që kryeministri kryen me vendim të tij.

Kryeministri nuk ka asnjë tagër që të shkojë e të lajmërojë kryetarin në detyrë, funksion ky që i takon Këshillit Bashkiak dhe këtë uzurpim ai e bën sepse është i shqetësuar për veten dhe mandatin e tij si dhe për marrëdhënien që do ketë ai me drejtësinë.

Kërkojmë që Rama të zbatojë ligjin, të shkarkojë menjëherë Veliajn duke u hapur rrugë procedurave ligjore dhe jo ta qajë atë natën, e t’i marrë vendin ditën",- tha Ilir Alimehmeti./CNA