PSD prezanton në Shkodër programin elektoral/ Doshi: Do të luftojmë për 3 mandate

22 Shkurt 2025, 17:24, Politikë CNA

Partia Social Demokrate ka prezantuar në Shkodër programin e saj për zgjedhjet parlamentare të 11 majit. Kreu i PSD, Tom Doshi konfirmoi kandidaturën e tij për deputet në Shkodër dhe u shpreh se partia e tij do të luftojë për 3 mandate në këtë qark. Doshi i bëri thirrje Diasporës dhe gjithë Shqipërisë për të votuar PSD më 11 maj.

"Po e deklaroj sot që unë do të jem deputet i Shkodrës për 4 vite.Qëllimi ynë është jo më me 2 deputet, por duke parë punën dhe mbështetjen që kemi në qarkun e Shkodrës ne do të luftojmë për 3 mandate.Për Diasporën kam një thirrje të votojë Partinë Social Demokrate në qoftë se ata duan të shohin njerëzit e tyre më të lumtur. Thirrja është jo vetëm për qarkun e Shkodrës, por për të gjithë shqiptarët votoni Partinë Social Demokrate", tha Doshi.

Teksa shpalosi programin, sekretari organizativ i PSD, Klementin Mile tregoi pikat kryesore ku do të mbështetet. Ai tha se nuk do të ketë pension më të ulëët se 190 euro.

"Një nga pjesët kryesore që ne e nisim programin është ekonomia.10 mln euro që t’i japim nga buxheti i shtetit që bizneset të kenë asistencë teknike falas. SPAK, GJKKO pra organet e drejtësisë të gjitha kanë mbështetjen tonë të plotë. Do subvensionojmë fermerët për çdo njësi prodhimi dhe krerë bagëtish.Të mos ketë pension më të ulët se 190 euro. 10% të vendeve të punës në administratën publike të jenë per të rinjt e sapodiplomuar. Mininuni jetik për të gjithë njerëzit do të jetë 220 euro në muaj", tha Mile.

Kreu i PSD, Doshi e cilësoi programin e partisë së tij të përshtatshëm për çdo familje shqiptare dhe tha se premtimet e PSd janë të gjitha të realizueshme.

"Për këtë program kanë punuar si të ishin duke bërë një buxhet të shtetit.Është trajtuar si një kryefamiljar çdo gjë që i nevojitet një familje. Është buxheti i qytetarëve për ekonominë shqiptare. Premtimet tona janë të gjitha të realizueshme që nga fermeri, të sëmurët, pensionistët, invalidët”, u shpreh Tom Doshi.

PSD synon zgjerimin e saj në gjithë vendin ndërsa në zgjedhjet e fundit lokale në qarkun Shkodër doli forcë e parë sa i përket numrit të këshilltarëve./ CNA