E fundit!

08:41 Aktualitet

Zvarrit pafundësisht proceset gjyqësore/ Sot, seanca e radhës e Veliajt në GJKKO

Sot do të mbahet seanca e radhës në Gjykatën e Posaçme kun...

Mediat italiane: Në 5 vitet e para të “mbretërimit” të Ramës, emigruan 260 mijë shqiptarë

14 Mars 2023, 07:51, Politikë CNA

Ndërsa presin që periudha e pafund e pasluftës të përfundojë, shumë vende të Europës Lindore ende jetojnë mes korrupsionit, rivalitetit dhe përplasjeve.

Kështu, popujt e ndarë për çdo gjë e gjejnë veten të bashkuar nga një qëllim i vetëm, të emigrojnë.

Kështu e nisur artikullin e përditshjma italiane “La Repubblica” e cila ka botuar një analizë sa u përket problematikave të mëdha me të cilat përballet Ballkani.

Mes shteteve të tjera media italiane ka shkruar edhe për vendin tonë, ku thuhet se një problem shqetësues është emigrimi.

Në artikull shkruhet gjithashtu se në 5 vitet e para të “mbretërimit” të Ramës kanë emigruar 260 mijë shqiptarë.

Artikulli i plotë i "La Repubblica":

Kryeministri shqiptar Edi Rama qeveris një vend të torturuar nga korrupsioni dhe varfëria, por gjen kohën të vizitojë ish-presidentin kosovar Hashim Thaçi në burg, ish-komandant i partizanëve shqiptarë të UÇK-së dhe i akuzuar për krime lufte në Tribunalin e Hagës. Nuk është rastësi që nga samiti në samit, Bashkimi Europian vazhdon të mbajë jashtë derës Ballkanin Perëndimor. Por çështja është tjetër. Ndërsa presin të kalojë periudha e pafund e pasluftës, gjithnjë e më shumë boshnjakë, serbë, shqiptarë dhe kroatë e kthejnë faqen duke emigruar.

Sipas Kombeve të Bashkuara, vetëm Guajana ka një përqindje më të lartë të banorëve jashtë vendit sesa Bosnja dhe Hercegovina dhe Shqipëria. Emigrimi çoi në uljen e popullsisë në moshë pune të Ballkanit Perëndimor me mbi 400,000 banorë nga viti 2016 në 2020. Popujt e ndarë nga gjithçka i bashkon dëshira për t’u larguar: qeveria e Beogradit ankohet se Serbia po humbet “një qytet në vit”, instituti statistikor vëzhgon me shqetësim se si popullsia ka rënë me 10 për qind në dhjetë vjet, në Bosnje Hercegovinë, Hulumtimi i Kombeve të Bashkuara zbulon se 72 për qind e të rinjve mendojnë se jetojnë në një vend “strukturalisht të korruptuar”, nga i cili pothuajse gjysma duan të largohen sa më shpejt të jetë e mundur.

Qindra mijëra i shpëtojnë varfërisë, korrupsionit, ndotjes. Dhe nëse në të kaluarën largoheshin kryesisht punëtorët, sot burra e gra, punëtorë e të diplomuar nisen.

"Në vitet ’90 të rinjtë tanë u larguan plot shpresë për të ardhmen. Sot njerëzit emigrojnë sepse kanë humbur çdo shpresë në vendin e tyre”, thotë Afrim Krasniqi, politolog në Universitetin e Tiranës.

Parashikimet e Kombeve të Bashkuara janë të pamëshirshme: Bosnja është e destinuar të humbasë 60 për qind të banorëve të saj në pesëdhjetë vitet e ardhshme, Shqipëria 66 për qind deri në fund të shekullit.

“Në paralelet e mia në vitin 2010 kam pasur njëqind nxënës, sot dhjetë. Nga ana tjetër, kurset e mjekësisë dhe infermierisë janë mbushur me studentë që tashmë e kanë në xhep biletën e largimit. Pesë mijë punonjës shëndetësorë shqiptarë janë punësuar vetëm në tri vitet e fundit dhe vetëm në Gjermani”, shprehet Krasniqi.

Agjencia Eurofound ka hetuar mirëqenien ekonomike të punëtorëve europianë: 5 për qind e danezëve e kanë të vështirë të përballojnë bukën e gojës, ndërsa në Shqipëri kjo shifër është 69 për qind. Gjithçka kërkon arratisje.

Edhe pse kryeministri Edi Rama vazhdon të gëzojë mbështetjen e Bashkimit Europian, vetëm në pesë vitet e para të “mbretërimit” të tij 260 mijë shqiptarë emigruan në Europë.

Dhe në vitin 2021 rifilloi fluksi me 42 mijë largime: “Rama pëlqehet sepse garanton stabilitet, por shqiptarët nuk dinë çfarë të bëjnë me stabilitetin”, komenton Krasniqi.

“Sa i përket Europës, ajo na paralajmëron për ndikimet ruse dhe kineze, por nuk bën asgjë për të kundërshtuar emigracionin ajo duket e favorshme në eksodin e fuqisë sonë punëtore të kualifikuar”.

Media italiane raporton se për vendet e rajonit, dikur BE shihej si “ilaçi" për të gjitha sëmundjet, por se tashmë ky qëndrim nuk ka të njëjtin popullaritet.

“Për vite me radhë, Bashkimi Europian dukej se ishte ilaçi për të gjitha sëmundjet.

Por pas kaq periudhe të mosavancimit, askush nuk mendon më njësoj. Në Shqipëri zgjedhjet e 2021-shit ishin të parat në të cilat nuk u fol për Europën"./CNA.al