web counter
LEXO PA REKLAMA!

SHKARKO APP

App Store
Google Play

Me Jenisherin, Kostën dhe Kujtim Gjuzin Shqipëria do duket më “madhështore”

4 Mars 2025, 15:32, Politikë CNA

Me Jenisherin, Kostën dhe Kujtim Gjuzin Shqipëria do duket më

Dje në mesnatë u dorëzua në Komisionin Qendror të Zgjedhjeve koalicioni “Partia Demokratike – Aleanca për Shqipërinë Madhështore”.

Koalicioni ka në përbërje 26 parti, Partinë Demokratike dhe 25 forca të tjera politike që e bëjnë këtë koalicion sa të çuditshëm në përbërje aq edhe qesharak.

Në koalicion janë një i burgosur për korrupsion dhe fshehje pasurie (Meta), një person nën hetim (Mediu), një lider opozite në detyrim paraqitje (Berisha), që të tre duket sikur i përndjek e shkuara e kohërave kur qeverisnin së bashku, sepse akuzohen për veprime të së shkuarës.

Përveç aleatëve tradicionalë si Duka, Ndoka, Mediu e jo rrallëherë dhe Meta, Berisha ka futur dhe forca politike të krijuara nga personazhe nga “opozita e re” e krijuar në vitin 2019 pas djegies së mandateve nga opozita zyrtare, figura që duken sikur kanë dalë nga vepra e Servantesit “Don Kishoti”.

Pas zgjedhjeve të vitit 2021 u duk se deputetët si Selami Jenisheri apo Kujtim Gjuzi nuk do riktheheshin më, të paktën nuk duhet të ktheheshin në një demokraci normale ku deputetët janë zëri i qytetarëve.

Kujtojmë që “opozita e re” përbëhej nga deputetë si “Kërpërata” ose Majlinda Haliaj, e cila zëvendësoi Bashën pas djegies së mandatit, Kostaq Papa “djali me kaçurrela që qeraste femrat me whiskey” në rini (tashmë pa flokë), apo Kujtim Gjuzi me orën dhe veshjen e çuditshme që nuk dinin të artikulonin në Kuvend asnjë çështje mbi situatën dhe kaosin ku ndodhej vendi.

Sot Gjuzi, Jenisheri dhe Papa drejtojnë disa forca politike që s’dihet se si gjykata u ka dhënë të drejtën për t’u krijuar, nisur vetëm nga emërtimet.

Me Jenisherin, Kostën dhe Kujtim Gjuzin Shqipëria do duket më

Kujtim Gjuzi drejton forcën politike Partia Kombëtare Konservatore Albania. Selami Jenisheri apo i njohur si deputeti me biçikletën “pink” drejton partinë Bashkimi Popullor i Pensionistëve Shqiptarë. Kostaq Papa, pra djali “kaçurrels”, drejton Partinë Emigracioni Shqiptar.

Me Jenisherin, Kostën dhe Kujtim Gjuzin Shqipëria do duket më

Nëse futemi dhe më thellë në listë shohim që Dule dhe Idrizi janë në një anë. Të jetë lufta ndaj Ramës më e fortë se çështjet dhe kauzat që i ndajnë?

Berisha tha se do të vendosë në listë të sigurt dhe në listë të hapur aleatë se është i detyruar. Pra dikush nga primaret do zëvendësohet nga Jenisheri, Gjuzi apo kaçurrelsi vetëm se nuk ka kaluar pragun.

Ky koalicion duket se i përfaqëson të gjithë, por jo njerëzit normalë të këtij vendi. E për në fund po analizojmë emërtimin. Si mund ta bëjnë këta personazhe Shqipërinë madhështore?

Përse na duhet madhështore kur thjesht mund të jetë normale, mjafton kaq. /CNA





Lajmet e fundit nga