“Jemi front i bashkuar me 26 parti”/ Berisha: Paraqitemi me programin më të mirë më 11 maj

1 Prill 2025, 17:58, Politikë CNA

“Jemi front i bashkuar me 26 parti”/ Berisha: Paraqitemi me

Kreu i Partisë Demokratike, Sali Berisha zhvilloi sot pasdite një takim me banorët e zonës së Bregut të lumit dhe anëtarët e degës nr. 9 në Tiranë, ku po prezanton paketën e emergjencës së 100 ditëve të para të qeverisjes së ‘PD-Shqipëria Madhështore’.

Në fjalën e tij, Berisha theksoi se në këto zgjedhje koalicioni i opozitës paraqitet para shqiptarëve me një front të bashkuar e më të gjerë se kurrë, me 26 parti politike.

Berisha tha se në 11 maj, PD u paraqitet qytetarëve shqiptarë me besimin se u jep përgjigjen më të mirë të gjitha problematikave të tyre, kudo që ndodhen ata, në qendër të Tiranës, apo në periferi.

Berisha u shpreh se PD ka hartuar programin më të mirë për një Shqipëri Madhështore, që sipas tij është fjalë e madhe, por plotësisht e realizueshme.

“Në këtë fushatë ne paraqitemi para shqiptarëve me një front të bashkuar më të gjerë se kurrë, 26 parti politike. Paraqitemi para shqiptarëve me mbështetje dhe një vlerësim ndërkombëtar për qëndresën tonë, qëndresë më të cilën ne garantuam vendin me opozitë dhe ecim të sigurtë, ecim të vendosur drejt fitores.

Paraqitemi para qytetarëve shqiptarë me të cilin ne besojmë se u japim përgjigjen më të mirë të gjitha problematikave të tyre, kudo që ndodhen ata, në qendër të Tiranës, apo këtu në periferi, në Shën Gjergj, apo në Dukagjin dhe në Pogonë. Ne kemi hartuar me ekspertizën më të mirë, me ekonomistët më të shquar të sotëm të SHBA-ve, Gjermanisë, mbështetjen e tyre, programin më të mirë për një Shqipëri Madhështore.

Kemi hartuar programin më të mirë për një Shqipëri Madhështore. Është fjalë e madhe, por plotësisht e realizueshme. Së pari e realizojmë, për ata që janë në nevojë, që mëzi garantojnë ushqimin e ditës për veten dhe fëmijët. Janë edhe mbi 7800 pensionistë që kanë shkrirë jetën dhe energjinë e tyre në punë, por tani marrin një shumë krejtësishte të papranueshme”,- tha Berisha./CNA