web counter
LEXO PA REKLAMA!

SHKARKO APP

App Store
Google Play

E fundit!

x

Fatmir Xhafaj, lobisti ilegal i Veliajt te gjyqtarët specialë/ Si po tenton ta nxjerrë nga qelia?

8 Mars 2025, 14:44, Politikë CNA
Fatmir Xhafaj, lobisti ilegal i Veliajt te gjyqtarët specialë/ Si po
Erion Veliaj dhe Fatmir Xhafaj

Erion Veliaj duket po përpiqet të lëvizë të gjitha fijet e mundshme për të lënë qelinë dhe për këtë ka angazhuar edhe bashkëpunëtorin e tij në Partinë Socialiste, Fatmir Xhafaj.

Kryetari i Bashkisë së Tiranës u arrestua më 10 shkurt me urdhër të SPAK-ut me akuzat për korrupsion dhe pastrim parash. Gjykata e Posaçme vendosi që Veliaj të qëndrojë në paraburgim duke konfirmuar masën e sigurimit personal të arrestit në burg.

Që pas arrestimit, Veliaj ka vënë në jetë një sërë mekanizmash për të shijuar sërish lirinë, pavarësisht akuzave të rënda ndaj tij. Akuza që kryebashkiaku i ka mohuar, duke deklaruar se as ai dhe as familja e tij nuk kanë lidhje me korrupsionin. Hetimet e SPAK-ut megjithatë thonë të kundërtën.

Sipas prokurorisë, Veliaj ka shpërdoruar të paktën 1.1 milionë euro nga fonde publike, duke ua kanalizuar këto fonde bizneseve dhe në këmbim kanë përfituar familjarët e tij në mënyrë të paligjshme. SPAK konkludon se Veliaj dhe bashkëshortja e tij përfituan ryshfet nga fondet e Bashkisë apo kompani kontraktore – përfitime të paligjshme që u injektuan dhe ‘pastruan’ nëpërmjet një rrjeti OJF-sh dhe kompanish të kontrolluara nga Ajola Xoxa.

Denigrimi i prokurorit

Beteja e Veliajt për të lënë qelinë dhe për t'u shfaqur i pafajshëm është zhvilluar njëkohësisht në disa fronte. Komunikimi publik është një prej fushëbetejave të zgjedhura, me Veliajn që përpiqet të shfrytëzojë hapësirat e mediave pranë tij dhe reagimet në rrjetet sociale për t'u pozicionuar si një viktimë e një prokurori, që sipas tij, po përdoret nga kundërshtari politik, Sali Berisha. Sulmet dhe denigrimet ndaj gjyqtarit që aprovoi masën e sigurisë “arrest në burg” ndaj tij dhe sidomos prokurorit të SPAK-ut që kërkoi mbylljen në qeli të kryebashkiakut duke vënë në pah rrezikshmërinë e tij për prishjen e provave, kanë qenë gati të përditshme nga ana e Veliajt.

Beteja ligjore

Rruga ligjore është një tjetër fushëbetejë e Veliajt. Ai ka ankimuar në Apel vendimin e GJKKO-së që e la në paraburgim, duke kërkuar lirinë.

Veliaj pretendon se prokurori i SPAK-ut, Ols Dado, është në konflikt interesi për të hetuar çështjen në ngarkim të tij, pasi sipas tij, i ka kërkuar një leje ndërtimi që Veliaj ia ka refuzuar. Kryebashkiaku ka kërkuar pezullimin e prokurorit të çështjes nga detyra, me anë të kërkesave drejtuar zyrës së Inspektorit të Lartë të Drejtësisë dhe Këshillit të Lartë të Prokurorisë – institucion ky që më herët shprehu publikisht shqetësime për sulmet publike të Veliajt ndaj prokurorit Ols Dado.

Loja e nëndheshme

Vëmendja megjithatë është përqendruar në Apelin e Posaçëm, që do të vendosë nëse do të pranojë ose jo kërkesën e Veliajt për të rrëzuar masën e arrestit me burg, lënë në fuqi nga Gjykata e Shkallës së Parë.

Sipas disa raportimeve mediatike, i vëllai i Veliajt, gjithashtu person nën hetim në të njëjtën dosje me kryebashkiakun, ka shpenzuar qindra mijëra dollarë për të kontraktuar një studio ligjore private amerikane për të përgatitur mbrojtjen në gjykatë.

Seanca për shqyrtimin e kërkesës së Veliajt do të mbahet më 11 mars dhe gjyqtari i çështjes është Engert Pëllumbi, i zgjedhur sipas njoftimit nga gjykata, përmes shortit.

Dhe një përpjekje e nëndheshme për të ndikuar te vendimi i gjykatës ka nisur. Nga burime të sigurta, “Gijotina.com” mëson se personazhi i cili po përpiqet të bëjë sekserin te gjyqtari i çështjes duke kërkuar një vendim në favor të Veliajt është pikërisht Fatmir Xhafaj.

Ky i fundit njihet për ndikimin në fushën e drejtësisë dhe sipas disa raportime mediatike, disa nga zyrtarët me funksione të rëndësishme janë pjesë e grupimit që është etiketuar si “klani Xhafaj i drejtësisë”. Me influencën në këto rangje, që është qartazi një përpjekje e paligjshme për të ndikuar në një vendim gjyqësor, Xhafaj po kërkon pikërisht të shpëtojë aleatin e tij Erion Veliaj.

Mbrojtja publike e Veliajt nga Xhafaj

Xhafaj nuk e ka fshehur asnjëherë pozicionimin e tij pro Veliajt. Me një postim të gjatë në rrjetet sociale më 15 shkurt, disa ditë pas arrestimit, kreu i komisionit të posaçëm parlamentar që shihet gjegjësisht si anti-SPAK, sulmoi drejtësinë duke shprehur mbështetje për kryebashkiakun në paraburgim.

“…Një pjesë e njerëzve që shërbejnë në sistem kanë ndryshuar pak në mentalitetin, qasjen dhe sjelljen e tyre në raport me ligjin dhe detyrën”, u shpreh Xhafaj duke sulmuar zyrtarët e drejtësisë.

Për Veliajn, nga i cili dyshohet, të paktën sipas raportimeve mediatike se ka përfituar përmes një ndërtuesi leje ndërtimi të shumta në Tiranë, thotë se “Erion Veliaj, për aq sa e njoh dhe si e njoh, nuk është një zyrtar i korruptuar”.

Shigjetimet ndaj SPAK-ut dhe GJKKO-së në përpjekje për të mbrojtur të arrestuarin për korrupsion dhe pastrim parash i vijon edhe më tej teksa shton se “duke lexuar vendimin gjyqësor që ka pranuar e certifikuar kërkesën e prokurorit për masë sigurie ‘arrest me burg’ bindem edhe më shumë për një proces jo të drejtë në aspektin procedural”.

“Faqet e shumta të vendimit gjyqësor nuk bindin dot askënd që ka minimumin e kulturës juridike që masa e marrë është proporcionale dhe në përputhje me kërkesat e Kodit të Procedurës Penale lidhur me këtë masë sigurie. Ca më keq akoma nuk bindin kur shtron në diskutim dobinë dhe interesin publik, përfshi dhe momentin politik e elektoral kur ajo u dha. Nëse këtë e bashkon pastaj edhe me fillimin ‘anonim’ të kësaj çështjeje, mënyrën e procedimit, mënyrën se si iu servir publikut gjatë hetimit dhe pas vendimit gjyqësor, me disa ‘argumente’ që përdoren për këtë vendimmarrje që nuk pëputhen me të vërtetën që ne njohim dhe akoma më keq kur dëgjon për presione e shantazhe ndaj dëshmitarëve të pyetur, me të drejtë kjo e vendos në pikëpyetje integritetin profesional e moral të këtij procesi duke e bërë atë të dyshimtë në sy të çdo profesionisti të ligjit dhe vetë publikut”, shkroi më tej Xhafaj në postimin në “FB”, duke përmbyllur silurimin ndaj SPAK-ut e GJKKO-së.

A duhet të marrë masa Prokuroria e Posaçme?

Në kushtet kur kemi të bëjmë me një përpjekje të jashtëligjshme për të ndikuar në një nga çështjet më të nxehta të muajve të fundit, SPAK duhet të vihet në lëvizje. Ky ishte konkluzioni i disa prej njohësve të ligjeve me të cilët u konsultua “Gijotina” për rastin.

Një analogji që mbështet argumentin është shënuar së fundmi. Duke u nisur nga dyshimet se mbi një gjyqtar të Kushtetueses do të ushtrohej ndikim i paligjshëm për të ndikuar në çështjen e përgjimeve të “SKY”, prokuroria urdhëroi përgjimin.

Jemi në një situatë të ngjashme: Fatmir Xhafaj po tenton të ndërhyjë te gjyqtari i çështjes në mënyrë që të nxjerrë Erion Veliajn nga burgu./ Burimi: Gijotina.com





Lajmet e fundit nga