web counter
LEXO PA REKLAMA!

SHKARKO APP

App Store
Google Play

Erion Veliaj çon në Gjykatën Kushtetuese shkarkimin e tij

29 Shtator 2025, 08:54, Politikë CNA

Erion Veliaj çon në Gjykatën Kushtetuese shkarkimin e tij

Ish-kryebashkiaku Erion Veliaj ka dërguar në Gjykatën Kushtetuese shkarkimin e tij nga detyra.

“Këshilli i Ministrave, në krye të vendimit të shkarkimit, ka cituar si bazë ligjore vetëm nenin 100 të Kushtetutës dhe nenin 62 të ligjit për vetëqeverisjen vendore, sikur këto dispozita të ishin të mjaftueshme për të justifikuar kompetencën e tij. Me këtë qasje, do të pretendojë para kësaj Gjykate se akti nuk ka dalë mbi bazën e nenit 115 të Kushtetutës. Por një pretendim i tillë është tërësisht i pabazë. Kushtetuta, si akti më i lartë i rendit juridik, ka përcaktuar shprehimisht se në cilat raste mund të shkarkohet Kryetari i Bashkisë. Në mungesë të një autorizimi kushtetues, ligjvënësi nuk mund të shtojë vetë raste të tjera shkarkimi që nuk përfshihen në këtë parashikim dhe që Kushtetuta nuk i ka autorizuar që ligjvënësi ti bëjë. Për më tepër, edhe nëse i referohemi nenit 62 të ligjit për vetëqeverisjen vendore, ky i fundit parashikon vetë se është nxjerrë “në bazë dhe për zbatim të  nenit 115 të Kushtetutës”, pra nuk mund të kuptohet dhe as të zbatohet i shkëputur nga neni 115, që është burimi i vetëm kushtetues i kompetencës për shkarkimin e një organi vendor të zgjedhur”, theksohet në ankimimin e Veliajt në Gjykatën Kushtetuese.

Veliaj u shkarkua më 25 shtator me vendim të Këshillit të Ministrave pasi u propozua nga Këshilli Bashkiak.

“Kryeministri Edi Rama, vendim për shkarkimin nga detyra të kryetarit të Bashkisë Tiranë, z. Erion Veliaj

Në mbështetje të nenit 100 të Kushtetutës dhe të shkronjës 'c', të nenit 62, të ligjit nr.139/2015, 'Për vetëqeverisjen vendore', të ndryshuar, me propozimin e ministrit të Shtetit për Pushtetin Vendor, Këshilli i Ministrave

V E N D O S I:

Z. Erion Veliaj, kryetar i Bashkisë Tiranë, shkarkohet nga kjo detyrë, me propozimin e Këshillit Bashkiak Tiranë, miratuar me vendimin nr.69,  datë 23.9.2025.

Ky vendim hyn në fuqi pas botimit në 'Fletoren zyrtare'”, thuhej në VKM.

Mbi Veliajn rëndojnë 13 akuza për 5 vepra të rënda penale. Ai u arrestua më 10 shkurt të këtij viti./ CNA





Lajmet e fundit nga