Eno Bozdo: Shell u tërhoq nga pusi i Shpiragut, Rama t'u kërkojë falje shqiptarëve

15 Prill 2024, 12:01, Politikë CNA

Eno Bozdo

Anëtari i Kryesisë në PD, Eno Bozdo, u shpreh në një deklaratë për mediat se kryeministri Edi Rama ka gënjyer kur tha se në Shpirag u zbulua naftë, njëlloj si kur gënjen sipas tij për përfshirjen e vartësve të vet në korrupsion.

"Kompania Shell konfirmoi tërheqjen përfundimtare nga puset e Shpiragut. Fatkeqësisht nuk do të ketë shpime të mëtejshme dhe as një ‘mrekulli nafte’, siç gënjen Rama. Lajmi ishte konfirmuar thuajse zyrtarisht nga shmangia e këtyre muajve e Ramës dhe Ballukut, sa herë që gazetarët pyesnin për këtë çështje", u shpreh Bozdo.

Deklarata e plotë:

A e mbani mend Edi Ramën që sa herë kishte një krizë në qeverisje thoshte se kompania Shell ka zbuluar naftë në Shpirag? A e mbani mend kur bridhte si Enver Hoxha duke hedhur kapelen andej-këtej nëpër Shqipëri dhe duke thënë ‘këtu ka naftë’?

Edi Rama gënjen njëlloj, si për përfshirjen e vartësve të vet në korrupsion, si për zbulimin e naftës, si për anëtarësimin në BE duke përdorur inteligjencën artificiale.

Kompania Shell konfirmoi tërheqjen përfundimtare nga puset e Shpiragut. Fatkeqësisht nuk do të ketë shpime të mëtejshme dhe as një ‘mrekulli nafte’, siç gënjen Rama. Lajmi ishte konfirmuar thuajse zyrtarisht nga shmangia e këtyre muajve e Ramës dhe Ballukut, sa herë që gazetarët pyesnin për këtë çështje.

E vërteta është se shumë eksplorime në botë, të Shellit apo kompanive të tjera të mëdha, mund të dështojnë sepse e tillë është industria e naftës dhe niveli i teknologjisë së përdorur. Por po kaq e vërtetë është që në asnjë rast, asnjë kryeministër apo zv/kryeministër, në asnjë vend të botës nuk dezinformon qëllimisht opinionin publik mbi rezerva nafte dhe pasurie të cilat ende nuk janë konfirmuar përfundimisht dhe zyrtarisht.

Ekzaktësisht në 23 gusht të vitit të kaluar, Rama dhe zëvendësja e tij, deklaruan për shqiptarët se nafta e zbuluar ishte e cilësisë më të mirë e krahasueshme me atë të Arabisë Saudite, dhe se rezervat ishin në nivelin e Norvegjisë. Sipas Ramës, pas një investimi që do të shkonte deri në 7 miliardë $, shqiptarët do të përfitonin pasuri të paimagjinuara. Dukej sikur Rama dhe Balluku e kishin mbyllur me Zotin dhe Shell-in për puset e naftës dhe problem kishin si t'i përdornim qindra e qindra miliona euro në vit që Shqipëria do të përfitonte.

Rama hodhi edhe një ide ‘origjinale’: paratë e pafundme do t’i përdorte te pensionet, rrogat, arsimin dhe shëndetësia. Ironike po ta mendosh se janë pikërisht këto sektorë ku qeveria ka dështuar sepse ka vjedhur në forma spektakolare.

Kryeministri dhe zëvendësja e tij duhet të kërkojnë minimalisht falje para publikut për gënjeshtrën stratosferike që servirën.

Kundër këtij gënjeshtari patologjik dhe vargut të rrenacakëve dhe hajdutëve që ka rreth vetes, qëndron publiku që nuk gënjehet dhe opozita e vendit. Midis braktisjes se Shqipërisë dhe bashkimit në një front të vetëm për të rrëzuar këtë regjim asfiskues, hajdut dhe gënjeshtar, shqiptarët duhet të zgjedhin rezistencën.

Partia Demokratike do t’i prijë kësaj beteje dhe do ta fitoje atë.

Mblidhemi të premten për t'u përballur me një tjetër gënjeshtar patologjik, Erion Veliajn, dhe bandën e tij të hajdutëve. O sot, o kurrë!/CNA