web counter
LEXO PA REKLAMA!

SHKARKO APP

App Store
Google Play

“Dha kontribut të madh në çështjen e Kosovës”/ Berisha mban 1 minutë heshtje për Bujar Bukoshin

10 Qershor 2025, 12:50, Politikë CNA

“Dha kontribut të madh në çështjen e

Kreu i Partisë Demokratike, Sali Berisha, e nisi konferencën e sotme me gazetarët me fjalën e tij mbi lajmin e ndarjes nga jeta të politikanit të njohur të Kosovës, Bujar Bukoshi.

Berisha mbajti një minutë heshtje për Bukoshin.

Kryedemokrati vlerësoi Bukoshin si shtetar dhe rolin e tij në çëshjten e Kosovës dhe çështjen shqiptare.

“Një lajm i trishtë vjen nga Prishtina. Një personalitet i shquar, një atdhetar i flaktë, një shtetar i formuar, i përkushtuar, ish-kryeministri i parë i Republikës së Kosovës, kryeministër i qeverisë së parë në ekzil i Kosovës, bashkëpunëtori më i afërt, më i ngushtë i presidentit Rugova, Bujar Bukoshi u nda sot nga jeta.

Bujar Bukoshi dha një kontribut madhor në çështjen kombëtare. Krahas presidentit Rugova, ai luajti një rol të madh, së pari në organizimin e pushtetit paralel të shqiptarëve të shtypur në Kosovë, pushtet i shkëputi ata përfundimisht nga shteti i pushtuesve.

Por Bujar Bukoshi një intelektual atdhetar, diplomat i aftë, e përfaqësoi Kosovën në të gjitha institucionet dhe kancelaritë e vendeve të lira.

Paraqiti së bashku me presidentin Rugova çështjen e saj dhe mbështeti fuqishëm në kohën e duhur krijimin e Ushtrisë Çlirimtare të Kosovës.

Ishte pikërisht nën udhëheqjen e presidentit Rugova dhe qeverisë së tij, koha në të cilën njësitë e para të kësaj ushtrie u stërvitën në qendra ushtarake të ndryshme të Shqipërisë.

Ministria e Mbrojtjes e kësaj qeverie organizoi gjatë luftës forcat e armatosura të qeverisë së Kosovës, të cilët luftuan bashkërisht në beteja të ndryshme me njësitë e UÇK-së.

Bujar Bukoshi bëri gjithçka që gjatë luftës UÇK-ja dhe forcat e mbrojtjes të qeverisë së Kosovës të bashkërendojnë veprimet, luftimet.

Pra, ai dha një kontribut të madh në çështjen e Kosovës dhe në çështjen shqiptare.

Me këtë rast unë i shpreh popullit të Kosovës, familjes Bukoshi, zonjës Bukoshi dhe fëmijëve të tyre, ngushëllimet më të ndjera të miat, të PD-së dhe opozitës.

Ju ftoj të mbajmë një minutë heshtje në nderim të këtij statisti të shquar të kombit shqiptar”,-tha Berisha./CNA





Lajmet e fundit nga