web counter
LEXO PA REKLAMA!

SHKARKO APP

App Store
Google Play

E fundit!

x

Denoncimi: SPAK-u po “ledhaton” Beqajn sepse është mik i Ramës

25 Nëntor 2023, 12:26, Politikë CNA
Denoncimi: SPAK-u po “ledhaton” Beqajn sepse është mik i
Ish-ministri Ilir Beqaj

Deputetja demokrate, Albana Vokshi e ka quajtur SPAK-un një vegël e Ramës dhe sipas saj kjo tregohet në përplasjen mes Prokurorisë së Posaçme dhe GJKKO-së për hetimin ndaj Beqajt dhe dosjen e sterilizimit.

Në një deklaratë për mediat Vokshi tha se shoku i kryeministrit, Beqaj, ledhatohet me masa sigurie kurse vartësit dhe bashkëpunëtorët e tij në krim bëhen “koka turku”.

Duke iu referuar masës së dhënë nga SPAK me detyrim paraqitje dhe dalje nga vendi për ish-ministrin Beqaj, Vokshi tha se kjo është një masë e lehtë dhe se kërkesa e GJKKO për ashpërsim të masës si pasojë e veprave të kryera është mëse normale.

“Gjykata e Posaçme kundër Korrupsionit del hapur kundër SPAK për vjedhjen kolosale të ish-ministrit të Shëndetësisë, mikut të Edi Ramës, Ilir Beqja. GJKKO është për një masë më të rëndë sigurie, bazuar në veprat penale të kryera nga ish-Ministri. Gjykata i cilëson shkeljet e ish-ministrit më të rënda se të Klodian Rrjepajt (ish-zv. Ministri i Shëndetësisë) dhe Ilir Rrapajt (biznesmen). Sipas GJKKO ka dyshime, bazuar në prova, se Beqaj përveçse ka shpërdoruar detyrën, ka falsifikuar vula, stampa dhe formularë. Për këto ai rrezikon deri në 7 vite burg. Rrjepaj dhe Rrapaj kanë marrë masën e sigurisë “arrest me burg”, kurse shefi dhe miku i tyre, Beqja, vetëm detyrim paraqitje dhe dorëzim pasaporte. Kjo ‘përplasje’ me GJKKO dhe SPAK dëshmon edhe njëherë atë që Partia Demokrartike ka theksuar me forcë prej shumë muajsh: SPAK është një aksesor politik i Edi Ramës. Vini re provat: shoku i kryeministrit, Beqja, ledhatohet me masa sigurie kurse vartësit dhe bashkëpunëtorët e tij në krim bëhen “koka turku” – tha Vokshi në një deklaratë për mediat.

Deputetja tha se në këtë rast dëmi është i dyfishtë: jo vetëm financiar, duke u vjedhur shqiptarëve qindra miliona euro, por edhe shëndetësor e si pasojë e kësaj jeta e mijëra qytetarëve është vënë në rrezik nga koncensioni korruptiv i sterilizimeve të Beqajt.

“Kjo, siç thekson edhe Gjykata, e shton rrezikshmërinë e ish-ministrit. Mjafton t’i referohemi Raporteve të KLSH për koncesionin e sterilizimit per dëmet e mëdha që ka shkaktuar që nga implementimit. Vetëm prej pagesave të jashtëligjshme të TVSH për sterilizimin, i janë mohuar rreth 9000 ndërhyrje kirurgjikale qytetarëve. Te Ilir Beqja publiku nuk duhet të shohë vetëm një ministër të korruptuar, por një njeri që për babëzinë e tij dhe të shefit në krye të qeverisë, është gati të sakrifikojë shëndetin dhe jetën e shqiptarëve të pafajshëm. Partia Demokratike e dënon me forcë këtë lidhje monstruoze mes pushtetit ekzekutiv të Edi Ramës dhe sistemit të Drejtësisë përfaqësuar nga SPAK,” – tha Vokshi.

SPAK ka dhënë masën e sigurisë me detyrim paraqitje dhe ndalimi të kalimit të kufinjve për ish-ministrin ilir Beqaj pasi gjatë periudhës që ai ushtronte detyrën si ministër i Shëndetësisë ka firmosur tenderin për koncensionin e sterilizimit të paisjeve kirurgjikale. Beqaj e ka justifikuar këtë tender si një nevojë immediate për të ulur riskun e infeksioneve post spitalore.

Dje në zbardhje të vendimit të GJKKO, theksohej se prokurori i çështjes,Edvin Kondili nuk e ka bërë punën si duhet pasi përveç vjedhjes, ish-ministri duhet të hetohej edhe për falsifikim të dokumentave.

Koncesioni i sterilizimit është cilësuar si kontrata më e shtrenjtë e partneritetit publik privat e qeverisë ‘Rama' në sektorin e shëndetësisë, e cila u ka kushtuar taksapaguesve shqiptarë rreth 76 milionë euro deri në fund të vitit 2022.

Pasi u hetua kjo dosje për 3 vjet, SPAK, kërkoi në gjykatë arrestimin e ish-zv.ministrin e Shëndetësisë, Klodian Rrjepaj dhe biznesmenit Ilir Rrapaj, të cilët aktualisht po vuajnë dënimin ndërsa ish-ministri është paraqitur disa herë në ambientet e Prokurorisë së Posaçme për të dhënë deklaratat e tij lidhur me këtë dosje./CNA

 





Lajmet e fundit nga