web counter
LEXO PA REKLAMA!

SHKARKO APP

App Store
Google Play

E fundit!

x

DENONCIMI: 6 shkeljet e Dritan Prençit në hetimin për inceneratorin e Tiranës

18 Janar 2024, 14:27, Politikë CNA
DENONCIMI: 6 shkeljet e Dritan Prençit në hetimin për
Belind Këlliçi

Anëtari i Kryesisë së Partisë Demokratike, Belind Këlliçi, në një deklaratë për mediat hodhi akuza ndaj prokurorit Dritan Prençi për hetimet për inceneratorin e Tiranës. 

Sipas Këlliçit, Prençi ka kryer 6 shkelje dhe vijon të pengojë hetimin e plotë dhe të thelluar të kësaj megaafere.

"Është koha që SPAK-u të mos fshihet më. Është koha që përfituesit dhe pronarët e vërtetë të kësaj sipërmarrjeje korruptive të dalin përpara drejtësisë. Nuk ka asnjë shqiptar në botë, që beson se në një aferë si inceneratori fantazmë i Tiranës, ku deri më sot janë vjedhur rreth 120 milionë euro, fajin e ka një ish-drejtor periferik i dalë në pension dhe një drejtor tjetër i Bashkisë Tiranë, i cili as në banjë nuk shkonte dot pa lejen e Erion Veliajt", shprehet Këlliçi. 

Reagimi i plotë: 

U bënë tashmë 3 muaj që sjellim përpara jush fakte të pakontestueshme se si prokurori i çështjes së hetimit të inceneratorit të Tiranës, ka fshehur provat që lidhin në mënyrë të drejtpërdrejtë kryebashkiakun Erion Veliaj me këtë megavjedhje.

Në vendimin e gjyqtares Irena Gjoka, për masat e sigurisë ndaj punonjësve të Bashkisë Tiranë, shihet fare qartë se prokurori i kësaj dosje, Dritan Prençi, ka fshehur:

1. Shkresën e Erion Veliajt dërguar ish-ministrit të Financave, Shkëlqim Cani, në të cilën kërkonte miratimin për të zhvilluar këtë koncesion, kërkesë së cilës ish-ministri i Financave i përgjigjet negativisht.

2. Komunikimin shkresor të Erion Veliajt me ish-ministrin e Financave, Arben Ahmetaj, të cilit i ridërgon kërkesën për miratimin e fillimit të procedurave për këtë koncesion. Arben Ahmetaj me një gjuhë edhe më të prerë dhe kategorike, i rikujton Veliajt se kjo kërkesë nuk është e bazuar në ligj, se studimi është i paplotë dhe se mungojnë fondet për të përballuar këtë koncesion.

3. Shkresat e dërguara në Këshill të Ministrave të ish-ministrit Lefter Koka, ku citohet shprehimisht se ky është një projekt i kërkuar me ngulm nga Erion Veliaj, për të cilin vetë kryebashkiaku kishte filluar dëgjesat publike, pasi e konsideronte si prioritar këtë koncesion.

4. Mbledhjen zyrtare të datës 28 shtator të vitit 2017, të Këshillit Bashkiak Tiranë, ku Erion Veliaj me zë dhe figurë mashtronte këshilltarët në vendimmarrjen e tyre, duke thënë se ky koncesion nuk do të sillte asnjë implikim financiar për Bashkinë Tiranë.

5. Të dhënat e dosjes hetimore ndaj Arben Ahmetajt, ku vetë drejtuesi i SPAK-ut, Altin Dumani, si prokuror i kësaj dosje, përmend e-mailet e zyrtarëve të Bashkisë Tiranë, komunikime, të cilat çuditërisht janë zhdukur nga dosja hetimore e Dritan Prençit.

6. Raportin e KLSH-së, të zhvilluara pranë ministrisë së Financave, ku citohet shprehimisht se Erion Veliaj nuk ka marrë miratimin e Këshillit Bashkiak për këtë kontratë koncensionare, e cila e futi Bashkinë Tiranë në një angazhim financiar 30-vjeçar, në vlerën 91 milionë euro.

Të nderuar qytetarë,

Edhe pse kanë kaluar 3 muaj nga publikimi i këtyre fakteve tronditëse, të pamohueshme, të dokumentuara nga vetë institucionet e shtetit shqiptar dhe madje edhe të vetë drejtuesit të SPAK-ut, sërish prokurori i dosjes së inceneratorit të Tiranës, vijon të pengojë hetimin e plotë dhe të thelluar të kësaj megaafere.

Çdo ditë që kalon, qytetarët e Tiranës vijojnë të paguajnë 80.000 euro në ditë për një shërbim, të cilin nuk e marrin, për një incenerator fantazmë që nuk ekziston, e ndërkohë personat dhe pronarët realë të kësaj sipërmarrjeje, Erion Veliaj dhe vetë kreu i qeverisë, Edi Rama, vijojnë të projektojnë vjedhje të tjera në kurriz të qytetarëve shqiptarë.

Është koha që SPAK-u të mos fshihet më. Është koha që përfituesit dhe pronarët e vërtetë të kësaj sipërmarrjeje korruptive të dalin përpara drejtësisë. Nuk ka asnjë shqiptar në botë, që beson se në një aferë si inceneratori fantazmë i Tiranës, ku deri më sot janë vjedhur rreth 120 milionë euro, fajin e ka një ish-drejtor periferik i dalë në pension dhe një drejtor tjetër i Bashkisë Tiranë, i cili as në banjë nuk shkonte dot pa lejen e Erion Veliajt. Hi sy shqiptarëve nuk u hidhni dot më./CNA 





Lajmet e fundit nga