Bylykbashi: SPAK shkeli Kushtetutën me Berishën, urdhëroi “detyrim paraqitje” pa autorizimin e Kuvendit

22 Tetor 2023, 08:33, Politikë CNA

Bylykbashi: SPAK shkeli Kushtetutën me Berishën, urdhëroi

Deputeti i Partisë Demokratike, Oerd Bylykbashi

Deputeti i Partisë Demokratike, Oerd Bylykbashi, ka reaguar për masën e sigurisë “detyrim paraqitje” që SPAK ka vendosur ndaj ish-kryeministrit Sali Berisha dhe takimin e oficerëve të policisë me kryedemokratin në selinë blu në orët e vona të darkës.

Bylykbashi tha në një prononcim për gazetarët se SPAK po shkel Kushtetutën, duke i kufizuar Berishës lirinë pa autorizim nga Kuvendi, duke qenë se ky i fundit ka imunitet për shkak të mandatit të deputetit.

Ashtu si ish-kryeministri, edhe deputeti e cilësoi vendimin e SPAK si vendim politik të kryeministrit Edi Rama.

“Pas akteve qartazi me një sfond politik nga një instrument gjoja i drejtësisë së re, i ngritur dhe i akuzuar që në fillimet kur është ndërtuar se po ndërtohet për t’u kapur dhe përdorur politikisht, pas asaj, në shkelje flagrante të Kushtetutës, SPAK dërgon Policinë e Shtetit, e cila në fakt është organ i zbatimit të ligjit dhe jo i urdhrave politikë të Edi Ramës, dërgon Policinë e Shtetit duke kërkuar ekzekutimin e një mase që kufizon lirinë e një deputeti të republikës, zotit Sali Berisha, deputet i Parlamentit të Shqipërisë, kryetar i PD-së.

Kufizon lirinë e tij në kundërshtim me Kushtetutën. Tashmë është praktikë e konsoliduar e parlamentit të Shqipërisë se prokuroria duhet të kërkojë leje nga Kuvendi, i cili duhet të japë autorizimin jo vetëm për arrestin, por dhe çdo lloj mase tjetër kufizimi të lirisë së çdo shtetasi shqiptar, që është deputet.

Neni 38 i Kushtetutës përcakton lirinë absolute, të cenueshme vetëm nëpërmjet një vendimi gjykate, të shtetasve shqiptare, të lëvizin të lirë në çdo pjesë të territorit të Shqipërisë. Urdhri për detyrim paraqitje të deputetit Sali Berisha kufizon pikërisht këtë liri kushtetuese”, u shpreh ai.

Bylykbashi ngriti pretendimet se SPAK ka shkelur Kushtetutën edhe me ndalimin e daljes nga territori i Shqipërisë.

“Po ashtu me kërkesën e SPAK-ut dhe vendim të gjykatës, në shkelje të Kushtetutës, përsëri kufizohet një e drejtë tjetër kushtetuese. Përsëri në nenin 28, është e drejta e çdo shtetasi që lirisht të dalë nga territori i Shqipërisë.

Sigurisht nëse do kishim një vendim gjykate për një shtetas të zakonshëm, kjo do ishte e mjaftueshme, por nenin 73 i Kushtetutës, detyron që në rast të arrestit apo të çdo lloj kufizimi në çdo formë të lirisë së një deputeti, duhet të kërkohet paraprakisht miratimi i parlamentit”, theksoi deputeti./ CNA