Berisha, mesazh Yuri Kim-it/ “U largove si sekretare e PS-së, kërkoju falje shqiptarëve”

22 Qershor 2023, 14:17, Politikë CNA

Berisha, mesazh Yuri Kim-it/ “U largove si sekretare e PS-së,

Ish-kryeministri Sali Berisha, me tone të ashpra i është drejtuar nga kuvendi ambasadores së SHBA-së në Tiranë, Yuri Kim-it, duke i thënë se pas 32 vitesh është e para ambasadore që largohet nga vendi si sekretare e Partisë Socialiste.

Berisha iu drejtua në distancë Kim-it, duke e akuzuar se ka abuzuar me pushtetin e përfaqësimit të vendit të saj.

Ish-kryeministri, në mesazhin e tij për Kim-in, shprehet se diplomatja duhet t'u kërkojë ndjesë shqiptarëve për Mc Gonigal për faktin që ajo nuk tha asnjë fjalë për këtë skandal, duke i shumëzuar me 0.

“Sot për krahun këtej, kam një lajm të hidhur, do mërziten shumë sepse sot për herë të dytë në historinë e SHBA-së në një akt shumë të rrallë dhe historik, kryeministri i Indisë, Modi, një burrë shteti i sanksionuar pak vite më parë, i drejtohet Kongresit të SHBA-së, me një fjalë të veçantë.

Këtë shans e ka pasur tri herë me radhë, gjeniu i politikës botërore, Uinston Çërçill, për së dyti kanë qenë të rrallë, të jashtëzakonshëm.

Nuk e solla këtu këtë, për të bërë ndonjë paralelizëm mes Modit dhe Sali Berishës, ndonëse e vërteta është si diamanti, i madh ose i vogël, shkëlqen pandalshëm dhe e vërteta triumfon në çdo lloj rrethane.

Po e solla për diçka tjetër. E solla për një kërkesë ndaj guvernatores Yuri Kim, që po largohet nga Shqipëria. T'u kërkojë falje shqiptarëve se në mënyrë të përsëritur u ka deklaruar atyre se, ky vendim sanksionimi nuk hiqet kurrë. Ftesa ime nuk ka lidhje me ndonjë vendim timin, por ka lidhje thjeshtë për t'i thënë asaj të nderuar që të kthehet tek e vërteta para se të largohet nga Shqipëria.

Në prag të largimit nga Shqipëria, duhet t'i them zonjës guvernatore se në historinë e pluralizmit dhe lirisë së këtij kombi, emri i saj do të mbetet i gdhendur si i një personi që abuzoi me pushtetin e përfaqësimit të vendit të vet dhe që së bashku me Edi Ramën, bëri gjithçka për të shkatërruar opozitën e vërtetë shqiptare, natyrisht, e dëmtove, por dështove.

Nga ana tjetër, me qëndrimet tuaja dhe bashkërendimin me qeverinë e narkotrafikantëve të Edi Ramës, je e vetmja ambasadore në 32 vite që largohesh nga ky vend e cilësuar gjerësisht si sekretare e PS-së, kjo nga unë.

Së treti, mendoj se këto pak ditë apo orë që të kanë mbetur, kërkoju ndjesë shqiptarëve për McGonigal, jo vetëm për sintoninë e veprimeve tuaja kundër opozitës shqiptare, por se në njërin nga skandalet më të mëdha të kohërave, nuk shqiptove, nuk u the atyre një fjalë të vetme për këtë skandal duke i shumëzuar kështu në mënyrën më të pamerituar me zero, si shoqëri dhe si komb.

Së fundi, si një admirues i palëkundur i vendit të madh të lirisë, SHBA-së, më duhet të shpreh keqardhje të thellë se ju të vetmin ‘sukses’ që merrni me vete është dëmtimi thelbësor me qëndrimet tuaja të reputacionit të shkëlqyer që kanë pasur dhe përsëri do të kenë, kombi dhe vendi i madh i lirisë në Shqipëri”, tha Berisha./ CNA