Këlliçi: 45 tenderë, 28 milionë euro dhe 3 leje ndërtimi nga drejtorët e Veliajt
23 Prill 2024, 13:57, PolitikëCNA
Anëtari i Kryesisë së PD-së, Belind Këlliçi, në një deklaratë për mediat nga selia blu, renditi disa fakte në lidhje me vjedhjet e drejtorëve të kompanisë “5D”, si edhe faktin se prej më shumë se 7 muajsh ka bërë publik dokumentacionin që e lidh në mënyrë të drejtpërdrejtë Erion Veliajn me inceneratorin e Tiranës.
Këlliçi tha se në lidhje me vjedhjet në bashki, nuk mjafton vetëm arrestimi i Mariglen Qatos dhe Redi Mollës, duke u kursyer për të disatën herë, kreu i kësaj organizate kriminale, si dhe pronarin faktik të inceneratorit të Tiranës, Erion Veliaj.
“Po bëhen tashmë 4 javë nga arrestimet e drejtorëve hajdutë të Bashkisë Tiranë, për megaaferën korruptive të kompanisë '5D KONSTRUKSION'.
Hetimet faktuan atë çka kemi kallëzuar 1 vit më parë, se si korrupsioni në Bashkinë e Tiranës tashmë nga norma 20-30-40% kishte kaluar në masën 100%.
45 tenderë me vlerë 28 milionë euro dhe 3 leje ndërtimi janë ato që ne faktuam me dokumente dhe prova të pamohueshme, për këtë grup të strukturuar kriminal.
SPAK dhe në këtë rast prokurori Klodian Braho, duket se janë mjaftuar vetëm me arrestimin e Mariglen Qatos dhe Redi Mollës, duke kursyer për të disatën herë kreun e kësaj organizate kriminale, si dhe pronarin faktik të inceneratorit të Tiranës, Erion Veliaj.
Nga kjo foltore, prej më shumë se 7 muajsh kam bërë publik dokumentacionin që e lidh në mënyrë të drejtpërdrejtë Erion Veliajn me inceneratorin e Tiranës.
Nga kjo foltore kam publikuar komunikime telefonike dhe e-maile që lidhin në mënyrë të drejtpërdrejtë Erion Veliajn me inceneratorin e Tiranës", u shpreh Këlliçi./ CNA
