U çmend UNICEF apo u qeveris keq në 3 mandate?

24 Qershor 2024, 12:29, Opinione Grigels Muçollari

U çmend UNICEF apo u qeveris keq në 3 mandate?

Grigels Muçollari, burimi PD

Disa studime dhe raporte të organizmave autoritare ndërkombëtare sjellin të dhëna alarmante për varfërinë në Shqipëri, për cilësinë e jetës. Tregojnë se ku po shkon ky vend në gjërat më bazike, më jetike.

Sa më shumë ngrihet oktava e propagandës për arritjet e qeverisë, aq më shumë tentohet të fshihet një tregues që dëshmon një tjetër realitet, krejt të kundërt nga ai që rrëfejnë boritë e rilindjes.

UNICEF konkludon se 47 për qind e fëmijëve nën 5 vjeç, janë në Shqipëri në varfëri ushqimore. A duhet më shumë sesa kaq për të kuptuar gjendjen, të vërtetën e këtij vendi? Unë do të doja shumë që kjo të mos ishte e vërtetë. Por UNICEF është një organizatë ndërkombëtare shumë serioze dhe objektive.

UNICEF: Shqipëria ka 47% të fëmijëve në varfëri ushqimore, lë pas vetëm Taxhikistanin në Europën dhe Azinë Qendrore
24 Qershor, 12:29

Nëse gjysma e të miturve këtu gdhihen të paushqyer si duhet, ngrysen pa marrë proteinat dhe kaloritë e nevojshme, ky është fundi, dështimi i një vendi.

Çfarë kuptimi ka për të folur për reforma, për integrimin, apo për apogjeun ku qeveria e ka çuar Shqipërinë në arenën ndërkombëtare, kur 47 për qind e fëmijëve nën 5 vjeç, nuk hanë mirë, ose janë të uritur?

Një dramë kjo që do të lërë gjurmë në gjithë jetën e këtyre të miturve, pasi ndikon në zhvillimin fizik, në nxënien, në kapacitetin mendor, ndikon në secilin drejtim.

U bë disa kohë që raportet e insistucioneve ndërkombëtare ulërasin për varfërinë në Shqipëri, për të ardhurat e ulëta, për fuqinë më të pakët blerëse në Europë. Dhe të gjitha këto lidhen me qeverisjen, që po konsumon mandatin e tretë të saj. Kohë e mjaftueshem për të sjellë përmirësim, dhe kohë e mjaftueshme për të sjellë përkeqësim. Përkeqësim ka ndodhur, dhe këtë nuk po e thotë tanimë vetëm opozita, por UNICEF, Eurostat, BB, BE, e shumë organizma të tjera.

Të dhënat e UNICEF

A ka reagim të Kryeministrit për këto raporte? Po të ministrave të linjës? Aspak. U mungojnë argumentet dhe të dhënat për t’i hedhur poshtë këto konkluzione, ndryshe do ta kishin bërë.

E vetmja rrugë që ndjekin për të mbuluar këtë situatë, është përpjekja e përditshme për të krijuar një realitet tjetër përmes propagandës, për t’u treguar qytetarëve se po jetojnë në një botë tjetër, jo në atë ku zgjohen çdo mëngjes.

Propaganda dhe ngjyrat me të cilat rreket qeveria të veshë realitetin janë një instrument për të kapërcyer një moment të vështirë, për të kaluar lumin. Po ato nuk të ndihmojnë nëse ke qeverisur keq 3 mandate. Nëse prioritet nuk ke pasur njerëzit e hallet e tyre, por interesin dhe pushtetin personal.