E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

A vritet lajmi duke vrarë lajmësit?

11 Qershor 2024, 11:58, Opinione Klodian Tomorri

Edi Rama dhe Arben Ahmetaj, burimi i fotos LSA

I nervozuar si kurrë më parë nga shembja e fadadës së rreme evropiane të ndërtuar me milionat e eurove lobuese që shpërndahen për Blairet, D’Alemat, Ursot, McGonigalët e sa e sa të tjerë të këtij soji që nuk dihen, Edi Rama rendi drejt strategjisë së vetme që i kishte mbetur për të sfumuar realitetin e shtetit mafioz të ekspozuar nga gazetarët e "Rai Tre". Te vrasja e lajmësit. Këtë radhë kjo ishte e detyruar, pasi nuk pinë më uje as batutat e zakonshme që zhvlerësojnë pyetjet e gazetarëve dhe as spërdredhjet e pafuqishme në italishten e mekur nga ulërima e fakteve.

Eliminimi i dëshmitarëve është strategji tipike e organizatave mafioze sa herë që punët e tyre dalin në shesh. Kur kjo është e pamundur fizikisht, atëherë lajmësit diskreditohen publikisht si të pabesueshëm dhe me karakter të lig. Jo pa qëllim, i gjithë aparati propagandistik i qeverisë dhe tambureve të saj, në dy ditet e fundit është përqendruar te goditja e atyre që folën në emisionin e "Report".

Arben Ahmetaj u bë derri në pyllin e dendur të pushtetit dhe gjarpri që mazhoranca e mbajti pafajësisht për 10 vite në gjirin e saj. Ky është një i arratisur nga drejtësia, i cili sajon akuza për shkak se i është refuzuar azili dhe qëndrimi në apartamentin luksoz të Luganos, ku paskan jetuar dhe VIP-a të rangut botëror.

Francesco Becchetti është një kriminel i dënuar me 17 vjet burg për pastrim parash. Ky me paratë e tij të pista, qenka një nga sponsorët e emisionit skifoz të "Rai"-t.

Francesco Becchetti, foto e marrë nga Google

Sali Berisha nuk ka nevojë për shume punë. Ky ka 10 vjet që është aty, sa herë që pushtetit i duhen armiq. Këtë herë, nga ballkoni ku e kanë strukur, Saliu gatoi përzierjen e helmatisur që u eksportua në studiot e "Rai"-t. Pra "non grata" i izoluar ndërkombëtarisht, qenka njëkohësisht gjeniu i fshehtë që drejton linjat editoriale të mediave më të rëndësishme të botës, nga "Rai" në Itali e deri te "Bild"-i në Gjermani.

Që cirku propagandistik të mbyllet tamam, i duhet vënë një njollë edhe Fatos Lubonjës. Dhe meqë këtij nuk i thonë dot as i korruptuar dhe as pjesë e rrethit të Berishës, i ngjitën damkën e urryesit patologjik dhe mllefaxhiut të kahershëm personal të kryeministrit.

Me pak fjalë, boshti i së keqes është bërë bashkë për të baltosur kryeministrin e mirë të Shqipërisë dhe flamurin e shqiptarëve.

Megjithatë, e gjitha kjo është një strategji e dëshpëruar. Për shqiptarët sot nuk përbën më asnjë grimë interes, nëse Arben Ahmetaj është burrë i mirë apo burrë i poshtër. Kjo çështje kishte interes publik në 10 vitet e shkuara, kur Edi Rama e mbante atë në postet më të larta të qeverisë. Tani që Ahmetaj nuk ka më në dorë asnjë qindarkë të shqiptarëve, për publikun ka interes vetëm një gjë. A janë të vërteta ato që thotë ish-zëvendësi i Ramës në arrati?

Edi Rama dhe Arben Ahmetaj, burimi i fotos LSA

Dhe këtu përgjigjet e para kanë filluar të vijnë tashmë. Arben Ahmetaj tha se kryeministri ndan copat e Shqipërisë duke ngrënë qofte. Por a nuk e pranoi vetë Edi Rama nën presionin e gazetarëve të "Rai"-t se në zyrën e tij bëhen biseda për licenca kazinosh?

Ahmetaj tha se në zyrën më të lartë të shtetit hyjnë e dalin lirshëm kapot e krimit të organizuar. Por a nuk u detyrua ta pranonte vetë kryeministri se në zyrën e tij ka pritur dhe njerëz të përfolur për lidhje me kartelet më të frikshme të drogës në botë?

E njëjta logjikë vlen edhe për Becchetti-n. Për shqiptarët tani nuk ka më asnjë pikë rëndësie se sa kriminel është Becchetti. Edhe sikur ky të jetë mafiozi më i madh i botës. Por për shqiptarët ka shumë rëndësi të kuptojnë se çdo një ministër i Meloni-t që bën biznes në Shqipëri, në ortakëri me një ish-ministre të Edi Ramës? Çfarë i ka lidhur këta?

Ndaj tamburet e propagandës mund të shtien batare pafund breshërish mbi lajmësit. Por edhe sikur t’i varrosin ata 7 pashë nën tokë, nuk do të arrijnë të vrasin dot lajmin. Sepse kazinotë, përgjimet e Sky-t, koordinatorët e personazheve të "Metamorfozës", kullat e Tiranës dhe resortet e ndërtuara mbi copat e falura të bregdetit janë aty. Në sytë e të gjithëve.