Çfarë izolimi!

1 Qershor 2024, 15:25, Opinione Artan Fuga

Çfarë izolimi!

Kur mendon se e gjithë Evropa e Bashkuar po zien nga debatet politike, në kuadrin e zgjedhjeve për në parlamentin evropian të 9 qershorit dhe mediat, politika, analistët tanë, programet e debatit politik të darkës, nuk lënë të kalojë asnjë informacion, asnjë ide, asnjë platformë, nga vendet evropiane fqinje me ne si Greqia, Italia, Kroacia, Sllovenia, apo në qendër të Evropës si Franca, Gjermania, apo më larg si vendet baltike, etj., thua booo, çfarë bëhet kështu!?

Po ne sikur jemi qendra e Evropës, kërthiza fare, ne sikur duam të hyjmë në Evropë, ne sikur u japim mend evropianëve se ç'duhet të bëjnë, ne sikur nuk e kemi gjysmën e kombit nëpër Evropë!

Asnjë ide, vlerë evropiane, prirje evropiane, problematikë debati, nocione të reja politike, çështje të reja që lidhen me të drejtat e sotme të qytetarit, asgjë, asgjë!

Njësoj sikur kishte vello heshtjeje në epokën totalitare!

Lëre të mendosh që partitë politike te ne të rimarrin krahun e partive politike simotra në Evropë, të ndajnë vlerat e tyre, lëre të vijnë te debati intelektual!

As bëhet fjalë, duket sikur jemi në planete të ndryshme.

Politika jonë luan prej kohësh polici - hajduti, sharjet dhe gjysmëfjalitë mediokre hidhen sa një anë te tjetra e parlamentit, kush ka kohë dhe kokë për vlera evropiane!

Sa më injorant publiku që voton në Shqipëri aq më kollaj do ta kenë kur të hyjnë në fushatë zgjedhjesh! Te ne fushata e zgjedhjeve bëhet me Nish Tulla, NSHRAK-u, më tej s'ka mendim! Media i çon reporterët deri te portat e SPAKU-t, kush hyri kush doli, kush ia ka ngenë të paguajë për korrespondentë që raportojnë aktualitetin ndërkombëtar në thellësi!

Analistë të specializuar në problematikat evropiane??? Ku jemi këtu, në Monako? Ne flasim në emisione për konspiracione shekullore, do të rrimë të merremi me se çfarë mendon Evropa dhe qytetari evropian për të ardhmen e tij!

Imagjino që një shqiptar që voton në Evropë dhe mendon nëse duhet të votojë ta zëmë për energjinë diellore, apo për atë ujore, ne e ftojmë të vijë të votojë në Shqipëri, nëse punon inceneratori i Elbasanit apo nuk punon, nëse funksionojnë “wc” e ish-Pallatit të Kulturës apo jo?

Çfarë izolimi total nga Evropa? Çfarë dëshire dhe strategjie për ta mbajtur shqiptarin në izolim mendor dhe politik!

Dhe pastaj pyesin veten: Përse nuk interesohet populli për politikën?

Se të vijnë trupa teatrore evropiane, të vijnë këngëtarë, të vijnë profesorë dhe gazetarë në takime të gjera, të vijnë politikanë evropianë për dialog me vendasit, të vijnë ekspozita pikture, ekspedita muzeore, etj., harroje!

Dhe në mes të këtij izolimi, duke kujtuar se bota përreth nesh nuk ekziston, ka ndonjë çudi që na duket vetja në qendër të botës, si rosaku i vogël që mendonte se bota ishte deri te gardhi i oborrit ku endej?

Mund të mendohet pastaj se ne po u afrohemi vlerave evropiane?/ CNA