E fundit!

15:16 Aktualitet

Komunikimi me Ramën dhe kërcënimi nga Bajrat/ Koçeku flet për largimin nga Grupi i PS-së

Deputetja Marjana Koçeku ka folur ditën e sotme lidhur me ...

Një pyetje analistëve tanë!

24 Janar 2025, 16:34, Opinione Agim Xhafka

E dija që do spërdridheshin si balerinat analistët tanë në se do fitonte Trump zgjedhjet presidenciale në USA. E merrja me mend se piruetat do i kishin kaq të vrullshme sa nuk do qe çudi në se do u binte të fikët nga trullosja e trurit.

E dija që do vraponin në krah të Trump e do tirrnin ditirambe për të. E dija që do stisnin skenarë pa fund që ta mënjanonin Soros, të heshtnin për arritjet madhështore të tij në të kaluarën siç na i shpalosën një dekadë e do i merrte entuziazmi për gjigantin Trump, për vizionarin Trump, për Mesian Trump.

Nuk kanë kaluar as tre ditë që Trump hyri në zyrën ovale dhe më dolën krejt parashikimet. Se analistët tanë janë të parashikueshëm. Janë lajkatarë, janë lëpirësa dhe jetojnë e shumohen prej pështymës. Aspak nuk çuditem që tash ia nisën këngës, Trump do mbështesë Ramën.

Nga që ai ka një tip me Ramën, është në mendim binjak me Ramën, se çfarë do i duhet në Shqipëri Rama ia shet në vend. Veç Sazanit mund t’i japë edhe Korfuzin p.sh po ta kishte në dorë.

Kjo aradhë komentatorësh televizivë që na mbin në sy veçanërisht darkave do vazhdojë kështu për katër vite të presidencës Trump. Do mbërrijnë deri atje sa dhe shenjat e horoskopit do i shpjegojnë me humorin e Trumpit, me sjelljen e tij.

Ata tani hiqen që dinë gjithçka. Që janë një hap para se dhe vetë Trump. Parashikojnë dhe kur ai do mbyllë luftërat, kur do të hapë puset e naftës, kur do të përlajë kanalin e Panamasë. Gjithçka, gjithçka do na e thonë mbrëmjeve. Aq me hollësi sa vetë Trump do lebetitej po t’i dëgjonte.

E me qenë se mendja e tyre, e analistëve tanë d.m.th, punon si orë zvicerane, por pa zemberek, dua t’u bëj një pyetje.

-Ore, analistët e leshit, a mund të na thoni në ka ndërmend Trump për vitin 2025 të bëjë ndonjë fëmijë?

Mendoheni dhe ma jepni përgjigjen në darkë. Në cilin televizion kombëtar të doni. Se njësoj janë, hiç ndryshim s’kanë. Ngjajnë si një bajgë kur rrota e qerres e ndan më dysh. /CNA