E fundit!

19:02 Kronika

Autori i maskuar me maskë dhe paruke/ Zbulohen detaje nga atentati në Elbasan

Tre persona janë plagosur me armë zjarri një natë më parë ...

Nga Iris Beqiri/ Më tepër sesa numri i deputetëve, duhet të na shqetësojë cilësia

29 Tetor 2025, 12:15, Opinione Iris Beqiri

Nga Iris Beqiri/ Më tepër sesa numri i deputetëve, duhet të

nga IRIS BEQIRI

Javët e fundit, gjithnjë e më shumë po përmendet dhe diskutohet rreth një uljeje të mundshme të numrit të deputetëve në Shqipëri. Një ndryshim i tillë është artikuluar edhe nga kreu i mazhorancës dhe opozitës, dakordësimi mes të cilëve mund të sjellë një ndryshim të shpejtë e që mund të miratohet brenda kësaj legjislature. Ka një sërë argumentesh e kundërargumentesh mbi këtë çështje, por thelbi i problemit nuk është kaq sipërfaqësor.

Nëse bazohemi vetëm në aspektin e numrave dhe i referohemi të njëjtit institucion në vendet e afërta në rajon, do të shohim: Kosova me 120 deputetë, Mali i Zi me 81 deputetë, Maqedonia e Veriut mund të ketë nga 120 deri në 140 deputetë, Serbia me 250 dhe Greqia me 300 deputetë. Sigurisht që numri i deputetëve në këto shtet varet nga specifika të caktuara, pasi veç numrit të popullsisë, merret në konsideratë edhe një numër i caktuar ulësesh në varësi të pakicave kombëtare.

Çfarë do të thotë pakësim i deputetëve?

Më pak deputetë në Kuvend do të krijonte hapësirën për më shumë debat politik, më pak zvarritje të procedurave parlamentare, më pak kosto për paga, staf dhe pension deputeti, por edhe më pak larmishmëri në përfaqësim, më tepër ndikim të jashtëm dhe kontroll mbi veprimtarinë e institucionit.

Por a është vetëm çështje numrash?

Ka një dallim të madh ndërmjet fokusit te numri i deputetëve dhe fokusit te cilësia e figurave që mbajnë një detyrë aq të lartë sa përfaqësimi i popullit. Është e rëndësishme që një përfaqësues të jetë një individ i përgatitur, me integritet, vendimmarrës, besnik ndaj ideve të tij dhe votës së popullit.

Shqetësimi i ngritur së fundmi nga politika shqitpare mbi numrin e përfaqësuesve në Kuvend mbart edhe një absurd. Të mos harrojmë se për një kohë të gjatë votimi kryhej për një subjekt politik, pa listë të hapur, por me një emër të zgjedhur nga partitë politike dhe pamundësia për të votuar drejtpërdrejt kandidatin e preferuar ishte një e vërtetë e garës së zgjedhjeve.

E jo vetëm kaq, servirja e emrave pa asnjë kontribut në shoqëri, në rastin më të mirë, e deri te figurat me një të kaluar problematike me ligjin dhe drejtësinë, ka qenë një element i pandryshuar për një kohë të gjatë.

Nëse më e mira për politikën është diskutimi për numrin e deputetëve në Kuvend, më e mira për shoqërinë është përqendrimi te figura dhe veprimtaria e atyre që duam të na përfaqësojnë.