Jonada nuk do të jetë viktima e fundit, të jeni të sigurtë

3 Gusht 2022, 15:26, Opinione Mentor Kikia

Jonada nuk do të jetë viktima e fundit, të jeni të

Foto ilustruese

Në plazhet e Jugut skafet dhe motorrat e ujit u kolektivizuan. Policia i grumbulloi.

Përse? Që pushuesit të jetë të qetë në ujë, apo jo? Po në cilin vend ndalohen motorrat, gomonet, skafet? Askund. Motorrat nuk ka pse të ndalohen, ata duhet të ndalohen të lundrojnë mes njerëzve. Mjetet e ujit janë pjesë e argëtimit, por ato duhet të kenë vendin e vet. Kaq e thjeshtë është.

Këto lloj zgjidhjesh radikale që gjejmë ne, janë garancia absolute se kjo nuk është zgjidhje. Sapo të kalojë zhurma, ata do të lirohen një nga një, e do të rikthehen në bazë.

Ne nuk vëmë dot rregull, sepse ne kemi ndërtuar një shtet që funskionon me fushata. Një shtet që është në vullnetin e një njeriu.

Nëse ne do të vendosim:

1 -Kordonin e sigurisë, brenda të cilit akush të mos futet me mjet lundrimi

2- Koridorin ujor ku kalojnë mjetet e lundrimit për në stacionin e tyre, ku të mos futen njerëzit(që padyshim nuk është në mes të plazhit).

3-Masa të tjera sigurie që zbatohen edhe nga pushuesit dhe nga subjektet(që bidonat e benzinës, psh, të mos jenë në mes të diellit në 40 gradë)

Nëse bëhen këto ska nevojë për operacione anti-gomone.

A mendon kush se policia nuk i ka parë skafet dhe motorrat që lundorjnë mes kokave të njerëzve? Padyshim që po. Por, ose merr bakshinin patrulla, ose pronari është i partisë dhe ata thjeshtë e pyesin çdo ditë: Hë, ke pas noj çikë punë sot?

Sepse kështu u bë edhe kur plot 6 vjet më parë një biznesmen i hapi kafkën një turisit rus me skafin e tij. Po kështu u lëshua policia të mbledhë motorrat e të vërë rregull. Por ja ku jemi sërish, tek i njëti fillim.

Kështu ndodhi në Durrës kur u vra një pushues nga Kosova….

Kjo punë nuk është çështje e një drejtori, një polici, një ministri apo një kryeministri. Ne kemi ecur gjithmonë rrumpallë. Ne bëjmë ligje dhe rregulla vetëm për ti patur në letër, pasi nuk kemi marrëdhënie të mira me ligjin dhe shtetin.

Ndaj Jonada nuk do të jetë viktima e fundit!

P.S: Në vitin 1973, në Angli, një studim tregoi se numri më i madh i viktimave nga aksidentet me biçikleta, kishte ardhur si pasojë e goditjeve në kokë. Atëherë qeveria vendosi: Çdo çiklist duhet të mbajë kokore. U tha, u bë. Nga ajo kohë, askush nuk hipën në biçikletë pa kokore./ CNA.al