E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

47 vite më parë u pushkatuan dy poetët, Vilson Blloshmi dhe Genc Leka

17 Korrik 2024, 13:56, Opinione Besim Ndregjoni

47 vite më parë u pushkatuan dy poetët, Vilson Blloshmi dhe Genc

Sot mbushen 47 vite që u pushkatuan poetët Vilson Blloshmi dhe Genc Leka, dy yje lirie.

Vilson Blloshmi dhe Genc Leka lindën në muajin mars dhe diktatura ua mori jeten në muajin korrik.

Ata bënin pjesë në radhët e familjeve kundërshtare të regjimit komunist. Për këtë arsye u përfshinë në një proces agjenturialo-operativ të Sigurimit dhe më pas hetimor-gjyqësor të hetuesisë e gjykatës. U pushkatuan se deshën poezinë, deshën paqen, deshën lirinë!

Vilsoni 29 vjeç, Genci 36 vjeç, përse i pushkatuat or barbarë aziatikë me emër shqiptar!?

Saharaja s’di të ëndërrojë.

Ajo bluan gurë me mend’ e saj…
Saharaja s’ka këngë të këndojë,
Saharaja s’ka as lot të qajë.
Saharaja nuk ka miq e shokë,
Saharaja nuk ka bijë, as bir.
Saharaja është një copë tokë,
Thonë se dhe me natën s’shkon mirë

Shkëputur nga poezia e Vilson Blloshmit, me titull “Saharaja”, e konsideruar si vepër penale e “agjitacion e propagandë për dobësimin dhe minimin e pushtetit popullor.

Ata që i bënë ekspertizën e poezisë sot krenohen në emisionet televizive si shkrimtarë, si politikanë, i gradon Këshilli Bashkiak i hajdutëve të Tiranës në drejtim të komisioneve, ca moderatorë të paskrupullt që drejtojnë emisione televizive i nxjerrin fytyrat e xhelatëve të djeshëm përpara shoqërisë sikur këta janë engjëj, realisht ata janë xhelatë që u morën jetën poeteve të lirisë. Po turpi këtu te ne nuk njeh kufi!

Ka 34 vite që Vilsoni dhe Genci na lëshojnë piskamën “kur do t'i dënoni krimet e xhelatëve komunistë”, por kjo piskamë njerëzore përballet me heshtjen e Presidentit, të Parlamentit, të qeverisë, të opozitës!

Na fal Vilson, Genc vendin tuaj e tonin, Shqipërinë e ka përfshirë Saharaja! Ne të mbijetuarit e diktaturës u bëjmë homazhet me lule çdo korrik pranë dy kokave të mëdha prej bronzi që ndodhen krah për krah në një pellg me ujë të kristaltë në një platformë betoni në qytetin qëndror shqiptar të Librazhdit.

Lulet përkujtojnë Genc Lekën dhe Vilson Blloshmin, të cilët u ekzekutuan nga regjimi i diktatorit komunist Enver Hoxha më shumë se katër dekada më parë për shkak të poezive që ata shkruanin, megjithëse ato nuk ishin botuar kur ata u nxorën në gjyq. Ne synojmë që vepra e tyre të jetojë përgjithmonë, për hir të fjalës së lirë dhe shpirtit të tyre poetik.

Ju, edhe pse u pushkatuat, rroni në zemrën e popullit, ata që ju ekzekutuan, edhe pse janë gjallë fizikisht janë të vdekur!/CNA