"Ahengu shkodran”/ Kënga popullore mbush pedonalen e qytetit

30 Shtator 2025, 11:57, Kulturë CNA

Për të 13-in vit me radhë në Shkodër u zhvillua “Ahengu Shkodran” me disa prej këngëve popullore të përzgjedhura që këndohen në dasmat, gëzimet dhe oborret shkodrane. Për herë të parë ky aktivitet në ditën e trashëgimisë kulturore erdhi në pedonalen në qendër të qytetit duke bërë bashkë artdashës të ahengut, por edhe kalimtarë e turistë. Drejtuesi artistik i “Ahengut Shkodran”, Bardhyl Hysa, thotë se po tregohet një interes për të mbajtur të gjallë këtë traditë të hershme me këngët e vjetra popullore.

"Ahengu shkodran”/ Kënga popullore mbush pedonalen e qytetit

“Jam i kënaqur që 'Ahengu Shkodran' ka interes çdo vit. Një risi ishte organizimi këtë vit këtu në qendër, në pedonalen e qytetit. Kishim edhe një gjithëpërfshirje të zërave të rinj dhe fëmijëve për ta mësuar dhe trashëguar këngën shkodrane. Shkodra garanton talente të reja edhe në këtë fushë dhe nuk është e kollajtë që në dimensionet e sotme të reja ne ta mbajmë të pastër këngën shkodrane me talentet e reja. Me punën e të gjithëve zhvilluam këtë koncert në qendër të Shkodrës dhe me zërat e këngët e larmishme besoj se edhe publiku është kënaqur”, u shpreh Bardhyl Hysa.

"Ahengu shkodran”/ Kënga popullore mbush pedonalen e qytetit

Drejtuesi i orkestrës maestro Ilir Zogaj u shpreh se në dasmat shkodrane këngët e ahengut nuk po rezultojnë aq prezente ndaj edukimi i brezit të ri është mëse i nevojshëm.

“Është një vazhdimësi e denjë e cila është kthyer në një traditë. Organizimi në qendër të qytetit vlejti për mirë edhe pse kishte mundësi që të ishte një spektator më i gjerë. Padyshim që kishim edhe elementë të rinj dhe fëmijë që kënduan këngën shkodrane dhe kjo është një vazhdimësi e një tradite të mirë që kemi. E shoh në sytë e spektatorëve që e duan shumë këtë aktivitet. Këtë vit kemi bërë një përzgjedhje pak tjetër, jo ato këngët që njihen dhe janë bërë traditë dhe nuk më vjen mirë ta them që po këndohen vetëm një pjesë e vogël e tyre dhe ne e zgjeruam pak më shumë sepse ka shumë këngë Shkodra. Ku ka më bukur se të këndosh këngët e vendit tënd dhe kjo traditë të rikthehet”.

"Ahengu shkodran”/ Kënga popullore mbush pedonalen e qytetit

Albana Fani është prej këngëtareve që performoi e cila erdhi nga Amerika për “Ahengun Shkodran”, muzikë e cila i mungon në jetën e saj jashtë Shqipërisë:

“Gjithmonë kur vij në Shkodër është një emocion i veçantë dhe është një kënaqësi për mua që u ftova për të qenë pjesë e 'Ahengut Shkodran'. Unë jam rritur me këngën shkodrane, e kemi kënduar në oborre, në Shtëpinë e Pionerit, në Klubin e Rinisë dhe kudo dhe është një gjë shumë e bukur kjo vazhdimësi. Shpresoj që Shkodra t’i mbajë gjallë këto këngë bashkë me talentet e reja. Shpresoj shumë te Shkodra, tek arti, tek e bukura sepse duhet që ta çojmë përpara gjithmonë. Në Amerikë ku jetoj këto këngë më mungojnë shumë dhe atje kënaqësinë e kam kur hipi në makinë dhe i vendos. Për mua kënga është jeta dhe jam e kënaqur që erdha dhe isha pjesë”.

Pjesë e “Ahengut Shkodran” këtë vit ishin disa prej këngëtarëve më të mirë të rinj. Për herë të parë morën pjesë fëmijët e qendrës kulturore “Kujtim Alija” së bashku me qendrën “Pjetër Gaci” duke sjellë një larmi zërash dhe brezash në edicionin e 13-të ndërsa u mbajt edhe një homazh për këngëtarin Agim Molla, i fundit i Ahengut të pastër shkodran i cili u nda nga jeta pak ditë më parë./CNA