web counter
LEXO PA REKLAMA!

SHKARKO APP

App Store
Google Play

E fundit!

x

Pamje nga aksioni në Kapshticë/ Policia njoftim zyrtar, armët ishin fshehur në sendiljen e makinës

6 Tetor 2023, 19:10, Kronika CNA

Pamje nga aksioni në Kapshticë/ Policia njoftim zyrtar, armët

CNA raportoi këtë të premte se në Kapshticë ishte sekuestruar një arsenal armësh, për të cilin ishte arrestuar poseduesi, ndërsa e kishte pësuar edhe shoqëruesi i tij.

Për kapjen e armëve ka dalë pak minuta më parë me një reagim zyrtar policia e Korçës, e cila ka publikuar pamje nga aksioni.

Blutë raportojnë se kanë sekuestruar 3 armë zjarri automatik, 1 pistoletë, krehra të armëve të zjarrit dhe një sasi municioni luftarak. Armët ishin fshehur në sendiljen e makinës.

Ata kanë vënë në pranga shtetasit Xh. H., 41 vjeç, posedues i armëve dhe M. V., 40 vjeç, pasagjer në mjetin ku u gjetën armët.

41-vjeçari rezulton person me precedentë penalë, pasi ka qenë i dënuar më parë për veprën penale "Moskallëzimi i krimit".

Njoftimi i plotë:

Policia Kufitare parandalon dhe godet një rast të tentativës për të trafikuar armë zjarri dhe municion, nga Shqipëria në drejtim të Greqisë.

Vihen në pranga drejtuesi i automjetit, me të cilin do të trafikoheshin armët e zjarrit dhe municioni, si dhe një bashkëpunëtor i dyshuar i tij.

Sekuestrohen 3 armë zjarri automatik, 1 pistoletë, krehra të armëve të zjarrit dhe një sasi municioni luftarak.

Si rezultat i intensifikimit të kontrolleve me përzgjedhje, me qëllim parandalimin dhe goditjen e trafiqeve të paligjshme dhe krimeve të tjera kufitare, nga shërbimet e Stacionit të Policisë Kufitare Kapshticë u parandalua dhe u godit një rast i tentativës për të trafikuar armë zjarri, nga Shqipëria drejt Greqisë. Si rezultat i bashkëpunimit me specialistët për Hetimin e Trafiqeve të Paligjshme të DVP Korçë, u arrestuan në flagrancë shtetasit:

-Xh. H., 41 vjeç (i dënuar më parë për veprën penale "Moskallëzimi i krimit") dhe M. V., 40 vjeç, të dy banues në Tiranë.

Në bazë të analizës së riskut shërbimet e Policisë Kufitare përzgjodhën për kontroll në vijë të dytë automjetin tip "Benz" me drejtues shtetasin Xh. H. dhe pasagjer 40-vjeçarin. Gjatë kontrollit me skaner u krijuan dyshime se në sediljen e prapme të automjetit ishin fshehur sende të kundërligjshme dhe për këtë arsye efektivët e policisë ushtruan kontroll më të detajuar ku gjetën 3 armë zjarri automatik, 1 pistoletë, 5 krehra me fishekë dhe një sasi municioni luftarak, të cilat së bashku me automjetin u sekuestruan në cilësinë e provës materiale.

Vijon puna për dokumentimin e plotë të ngjarjes dhe vënien para përgjegjësisë penale të personave të tjerë të implikuar në këtë aktivitet kriminal.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme./ CNA





Lajmet e fundit nga