Vjedhja në muzeun e Luvrit/ Dy të arrestuarit pranojnë përfshirjen

29 Tetor 2025, 18:10, Kosova & Bota CNA

Vjedhja në muzeun e Luvrit/ Dy të arrestuarit pranojnë

Dy të arrestuar, të dyshuar si të përfshirë në vjedhjen e bizhuterive të kurorës së Francës nga muzeu i Luvrit kanë pranuar përfshirjen në grabitje dhe janë lënë në paraburgim, njoftoi të mërkurën zyra e prokurorit të Parisit.

Prokurori i Parisit tha gjithashtu se bizhuteritë e vjedhura nuk janë në posedim të autoriteteve. Prokurorja e Parisit Laure Beçuau në një konferencë për shtyp deklaroi se dy të dyshuarit do të paraqiten para një gjykatësi hetues dhe mund të vihen nën hetim zyrtar.

Grabitja, një bastisje shtatëminutëshe gjatë ditës në Galerinë Apollo të Luvrit, tërhoqi vëmendjen e botës pasi hajdutët u arratisën me bizhuteri me vlerë dhjetëra milionë dollarë. Të dy të përfshirët u arrestuan të shtunën në mbrëmje dhe u mbajtën në paraburgim, ku u morën në pyetje për 96 orë. Dy të dyshuar të tjerë mbeten në arrati.

I dyshuari i parë, 34 vjeç, është me kombësi algjeriane. Ai kishte të dhëna të mëparshme për shkelje të trafikut dhe u identifikua nëpërmjet ADN-së së gjetur në një nga skuterët. I dyshuari i dytë, 39 vjeç, një shofer taksie i paligjshëm dhe shofer shpërndarjeje. Ai ishte i njohur më parë për policinë për vjedhje të rënduar. ADN-ja e tij u gjet në xhamin e thyer të një prej vitrinave.

“Nuk ka asgjë që sugjeron se katër autorët e krimit përfituan nga ndonjë formë ndihme e brendshme brenda muzeut. Ata janë aktualisht para një gjyqtari hetues me qëllim vendosjen e tyre nën hetim formal për krimet e grabitjeve si pjesë e një bande të organizuar – krime që mbartin një dënim me pesëmbëdhjetë vjet burg dhe një gjobë të rëndë”, deklaroi prokurorja e Parisit.

Më shumë se 100 hetues janë përfshirë në kërkimin e personave dhe autoritetet kanë arritur t’i gjurmojnë individët pasi analizuan më shumë se 150 mostra ADN-je dhe ekzaminuan disa sende që grupi la pas, të tilla si doreza, një helmetë dhe xhaketa me dukshmëri të lartë të lëna në vendngjarje.

Njëri nga burrat u arrestua në aeroportin Charles de Gaulle ndërsa përpiqej të largohej nga vendi. Ai u ndalua gjatë një kontrolli pasaportash përpara se të hipte në një fluturim mbrëmjeje për në Algjeri.

Bizhuteritë e vjedhura, midis tyre një gjerdan smeraldi me më shumë se 1,000 diamante të dhuruara nga Napoleoni gruas së tij të dytë, nuk u gjetën gjatë arrestimeve.

Më 19 tetor, hajdutët bastisën Galerinë Apollo në katin e sipërm të Luvrit, ku ndodhen xhevahiret e Kurorës Franceze. Ata përdorën një shkallë të montuar në kamion për të hyrë në galeri, një nga dhomat më të zbukuruara në muze, përmes një dritareje. Ata hynë me forcë në dy vitrina të sigurisë së lartë dhe vodhën nëntë sende, përfshirë një set bizhuterish me diamant dhe safir të veshura nga Mbretëresha Marie-Amélie dhe Mbretëresha Hortense./ CNA, përkthyer nga CNN