Nuk ka kthim pas/ Trump konfirmon interesin për Groenlandën

21 Janar 2026, 08:43, Kosova & Bota CNA

Trump kërcënon për të marrë kontrollin e Groenlandës, ndërkombëtarët kundërshtojnë.

Presidenti amerikan, Donald Trump, ka theksuar sërish kërcënimet e tij për të marrë kontrollin e Groenlandës, duke shkruar në rrjetet sociale se “nuk ka kthim pas” dhe se “Groenlanda është e domosdoshme”. Gjatë një konference për media në Shtëpinë e Bardhë, Trump u pyet se sa larg ishte i gatshëm të shkonte për ta marrë territorin dhe u përgjigj: “Do ta zbuloni vetë”.

Presidenti francez Emmanuel Macron paralajmëroi në Forumit Ekonomik Botëror në Davos për një “ndryshim drejt një bote pa rregulla”, ndërsa Kryeministri kanadez Mark Carney tha se “rend i vjetër nuk po kthehet më”. Trump ishte planifikuar të mbërrinte në Davos të mërkurën, por një problem i vogël elektrik në Air Force One detyroi kthimin e avionit dhe shtyrjen e udhëtimit.

Trump ka deklaruar se janë “shumë takime të planifikuara për Groenlandën” dhe se “gjërat do të shkojnë mjaft mirë” atje. Ai gjithashtu vuri në dyshim nëse NATO do t’i vinte në ndihmë SHBA-së në rast nevoje, duke thënë se “Ne do të shkojmë në ndihmë të NATO-s, por pyes vërtet nëse ata do të vijnë për ne”.

Ministrja e Industrisë dhe Burimeve Natyrore të Groenlandës, Naaja Nathanielsen, tha se banorët e ishullit janë “të habitur” nga kërkesat e Trump dhe se “ne nuk duam të bëhemi amerikanë” dhe se “të drejtat tona për të vendosur për të ardhmen tonë janë të pacenuara”.

Presidentja e Komisionit Evropian, Ursula von der Leyen, deklaroi se Evropa është “plotësisht e përkushtuar” ndaj sigurisë së Arktikut dhe se sovraniteti i Groenlandës dhe Danimarkës është “jo i negociueshëm”. Ajo gjithashtu kritikoi tarifat shtesë të propozuara nga Trump si një “gabim”.

Trump kërcënoi gjithashtu me një tarifë 10% për mallrat e importuara nga tetë vende evropiane nëse ato do të kundërshtonin marrëveshjen për Groenlandën, dhe me 200% tarifë ndaj verës dhe shampanjës franceze pas refuzimit të Macron për të marrë pjesë në një iniciativë paqeje për Gazën. Macron dhe zyrtarë të tjerë evropianë kanë dënuar përdorimin e tarifave si presion ndaj sovranitetit territorial dhe po shqyrtojnë masa kundërtarifore.

Kjo krizë ka tensionuar marrëdhëniet SHBA-Evropë dhe ka ngritur shqetësime mbi ruajtjen e rendit ndërkombëtar dhe mbrojtjen e sovranitetit të vendeve të vogla si Groenlanda./ CNA