web counter
LEXO PA REKLAMA!

SHKARKO APP

App Store
Google Play

KE-ja i jep dritën jeshile Bullgarisë për euron

4 Qershor 2025, 14:49, Kosova & Bota CNA

KE-ja i jep dritën jeshile Bullgarisë për euron

Komisioni Europian i ka dhënë dritën jeshile Bullgarisë për t’u anëtarësuar në eurozonë më 1 janar 2026, duke shënuar hapin e dytë të rëndësishëm të shtetit brenda një viti në rrugën drejt integrimit të plotë në Bashkimin Europian.

KE-ja, e cila u mblodh më 4 qershor për të marrë një vendim lidhur me këtë çështje, tha se Bullgaria i përmbush katër kriteret nominale të konvergjencës që përdoren për të vlerësuar nëse një vend është i gatshëm të adoptojë euron.

“Euroja është një simbol i prekshëm i forcës dhe unitetit europian”, tha presidentja e Komisionit Europian, Ursula von der Leyen.

Banka Qendrore Europiane pritet po ashtu që të publikojë mendimin e saj më 4 qershor, dhe zyrtarët bullgarë kanë thënë se presin një vlerësim pozitiv edhe nga ky institucion.

Këshilli i Bashkimit Europian do të marrë vendimin përfundimtar për pranimin e Bullgarisë në Eurozonë, duke u bazuar në opinionet e KE-së dhe Bankës Qendrore Europiane, si dhe në diskutimet me Eurogrupin dhe Këshillin Europian.

Edhe pse pranimi i euros ishte një nga kushtet për anëtarësimin në BE, dështimet legjislative – përfshirë reformat për luftimin e pastrimit të parave, shqetësimet për inflacionin dhe bllokadat politike (Bullgaria ka mbajtur shtatë procese zgjedhore në katër vjetët e fundit) – e kanë bërë këtë rrugëtim të vështirë për Sofjen.

Një vendim në favor të adoptimit të euros është hapi i dytë i madh i Bullgarisë brenda një viti në rrugën e shtetit drejt integrimit në BE.

Në janar, Sofja u bë anëtare me të drejta të plota e zonës Shengen dhe kufijtë e Bullgarisë me Greqinë dhe Rumaninë tani janë plotësisht të hapur./ Rel





Lajmet e fundit nga