Pafajësia e Acerbi-t, Juan Jesus: Po mbrojnë racizmin, si u ndryshua versioni i ngjarjeve

2024-03-28 15:03:00, Sport CNA

Pafajësia e Acerbi-t, Juan Jesus: Po mbrojnë racizmin, si u ndryshua

Mbrojtësi i Napolit, Juan Jesus, ka reaguar për herë të parë pas vendimit, ku Francesco Acerbi, u shpall i pafalsjëm për akuzat për racizëm.

Ai shfaqet i zhgënjyer nga vendimi, duke thënë se nuk ndihet më i mbrojtur.

Reagimi i Juan Jesus:

“Kam lexuar disa herë, me keqardhje të madhe, vendimin me të cilin gjykatësi sportiv konsideroi se nuk ka asnjë provë se unë kam qenë viktimë e fyerjeve raciste gjatë ndeshjes së 17 marsit, Inter-Napoli. Është një vlerësim që edhe pse e respektoj, mundohem ta kuptoj dhe më lë me hidhërim të madh.

Unë jam sinqerisht i dëshpëruar nga përfundimi i një çështjeje serioze, të cilën e kam trajtuar si zotëri, duke shmangur ndërprerjen e një ndeshjeje të rëndësishme, me gjithë shqetësimin që do t’u kishte shkaktuar shikuesve, duke besuar se qëndrimi im do të ishte respektuar dhe marrë ndoshta si shembull.

Ndoshta, pas këtij vendimi, ata që gjenden në situatën time do të veprojnë në një mënyrë shumë të ndryshme për të mbrojtur veten dhe do të përpiqen t’i japin fund turpit të racizmit, i cili, për fat të keq, po përpiqet të mbrohet.

Unë nuk ndihem i mbrojtur në asnjë mënyrë nga ky vendim, i cili lufton midis detyrimit për të pranuar se "prova e veprës penale është arritur me siguri" dhe pohimit se nuk ka siguri për natyrën e saj diskriminuese, e cila, përsëri sipas vendimit, "vetëm unë e paskam perceptuar".

Unë me të vërtetë nuk e kuptoj se si shprehja "largohu i zi, ti je thjesht një zezak…" mund të jetë sigurisht fyese, por jo diskriminuese. Në fakt, nuk e kuptoj pse u bë kaq shumë bujë atë mbrëmje, nëse vërtet do të kishte qenë një "shkelje e thjeshtë" për të cilën vetë Acerbi u ndje i detyruar të kërkonte falje, arbitri mendoi se duhej të informonte VAR-in, ndeshja u ndërpre për një minutë dhe shokët e tij të skuadrës po mundoheshin të flisnin me mua.

Nuk mund ta shpjegoj pse, vetëm të nesërmen dhe në grumbullimin me kombëtaren, Acerbi filloi një kthesë të versionit të ngjarjeve. Atë që ndodhi nuk e mohoi menjëherë, sapo mbaroi ndeshja. Nuk e prisja një fund të tillë, por kam frikë se mund të krijojë një precedent serioz për të justifikuar më pas disa sjellje. Sinqerisht shpresoj që kjo histori e trishtë për mua mund të ndihmojë të gjithë botën e futbollit të reflektojë për një çështje kaq serioze dhe urgjente”.