E fundit!

15:56 TODAY

The opposition makes noise/The Assembly adopts resolutions on the work of SPAK and other institutions

The opposition has caused a ruckus in the next parliamenta...

Hakimi rrezikon 15 vite burg, “tronditet” mbrojtësi

2025-08-01 20:27:00, Sport CNA

Zhvillime të reja kanë dalë në dritë lidhur me çështjen gjyqësore në të cilën është përfshirë mbrojtësi i PSG-së, Achraf Hakimi.

Prokuroria franceze ka propozuar zyrtarisht ngritjen e një padie penale ndaj futbollistit, i cili është nën hetim prej marsit të vitit 2023 si i dyshuar për përfshirje në një rast përdhunimi.

Sipas të dhënave të publikuara nga gazeta franceze “Le Parisien”, autoritetet kanë kërkuar që ndaj Hakimit të ngrihet zyrtarisht akuza dhe që çështja të kalojë për shqyrtim në gjykatën penale.

Ngjarja e dyshuar daton në muajin shkurt të vitit 2023. Një 24-vjeçare pretendon se futbollisti e ka ftuar në banesën e tij dhe gjatë qëndrimit atje, ka kryer veprime të papranueshme pa pëlqimin e saj. Ajo ka deklaruar se Hakimi e ka puthur dhe e ka prekur pa dëshirën e saj dhe më pas e ka detyruar të kryejë një akt seksual.

Pavarësisht se nuk depozitoi menjëherë një kallëzim penal, vajza ka raportuar incidentin në polici të njëjtën ditë. Më vonë, ajo i ka dërguar hetuesit mesazhe që përshkruajnë ngjarjen e përjetuar dhe pasojat emocionale që ka pësuar.

Tashmë, dokumentacioni dhe provat ndodhen në duart e një gjykatësi, i cili do të marrë vendimin për hapjen ose jo të procedimit penal ndaj lojtarit.

Nëse vendoset që rasti të kalojë në gjykatë dhe Hakimi të shpallet fajtor për akuzat që rëndojnë mbi të, ai mund të përballet me një dënim maksimal deri në 15 vite burg.

Nga ana tjetër, gjatë gjithë procesit hetimor, Hakimi ka mbajtur një qëndrim mohues ndaj akuzave. Avokatët e tij kanë deklaruar se bëhet fjalë për një përpjekje për përfitim financiar dhe shantazh ndaj futbollistit.

Në pritje të vendimit final të autoriteteve gjyqësore franceze, rasti vazhdon të mbetet një çështje e hapur me ndikim të mundshëm si në karrierën sportive të Hakimit, ashtu edhe në imazhin e tij publik.

Prokuroria nga ana tjetër, ka theksuar se procesi po ndiqet në përputhje me të gjitha procedurat ligjore dhe se vendimi për vazhdimin apo mbylljen e çështjes do të bazohet në vlerësimin e provave të mbledhura gjatë hetimit.