Gjici: Nuk do lejoj më tifozë problematikë në stadium, kemi paguar miliona për këta persona

2022-10-20 11:36:01, Sport CNA

Gjici: Nuk do lejoj më tifozë problematikë në stadium, kemi

Presidenti i nderit të Kukësit, Safet Gjici, ka folur për mediat, në prag të sfidës që verilindorët do të luajnë në shtëpi ndaj Egnatias.

Gjici foli edhe dënimin me disa ndeshje pa tifozë, ku u shpreh se nuk do të lejohen më tifozët që sjellin probleme për klubin në stadium. Duke iu referuar incidenteve në stadium, Gjici deklaroi se janë paguar miliona nga klubi, për problemet që sjellin tifozët.

Gjithashtu ai u shpreh se stadiumi është me kamera dhe të gjithë tifozët do përballen me drejtësinë, ndërsa shtoi se nuk do të lejohen më në stadium.

"Ajo çfarë unë sot do iu thoja tifozëve, është se kjo vepër madhështore e bërë në Kukës, një stadium madhështor është bërë pikërisht për standarde në sport. E patë se me presidentin e FSHF inauguruam fushën stërvitore. Lojtarët janë për të bërë gola. Nëse një lojtar shënon dhe goditet duke dëmtuar investimin dhe imazhin nuk është normale. Në fakt ka tifozë Kukësi, por janë një pjesë që nuk duhen pranuar në stadium. Me sa di unë policia ka bërë veprimet e veta për personin përgjegjës në kundërshtim me ligjin. Stadiumi monitorohet nga kamera.

Pamjet filmike janë dërguar në polici dhe ai person është para drejtësisë. Këto persona jo vetëm që do të dënohen, por nuk do të lejohen më në stadium. Ato që prishin stadiume të reja, nuk i duhen ekipit të Kukësit. Kërkoj nga Security dhe Policia Bashkiake që të merren masa ekstreme. Të respektohet rregullorja 100%.

Ju lutem tifozëve që e duan Kukësin dhe që janë shumë por që vijnë 10-15 pseudotifoza të mos i lejojmë në stadium. Të shkaktosh dëm ekonomik sepse kemi paguar miliona nga këta persona. Të dënosh tifozët pa asnjë faj dhe klubin, do të kërkojmë llogari. Ka dalë edhe ligji që policia bashkiake ka detyrim ligjor për të siguruar ndeshjen. Ne do ti evidentojmë të gjithë personat problematikë.", tha Gjici.

Në lidhje me ecurinë e skuadrës, Gjici u shpreh se Kukësi ka treguar rritje, por kanë ende punë për të bërë.

"Natyrisht që rezultatet tregojnë se Kukësi ka ekip. Është puna e mirë e trajnerit me rezultate dhe e shoh në ngjitje, por kanë akoma për të dhënë. Kampionati është i gjatë dhe nuk e përcaktojnë 3 ndeshje. Ishte fillimi më i keq por besoj se e ka marrë veten. Duhet të jemi me këmbë në toke sepse të gjitha ekipet janë aty-aty. Edhe me Erzenin kishim probleme që natyrisht trajneri i sheh dhe stafi teknik i shohin. Kështu është futbolli. Duhet të jemi me këmbë në tokë dhe të marrim ndeshjet një nga një e të shkojmë te objektivi që kemi dhe kërkojmë mbështetjen e tifozëve pasi u kthyem në Kukës që të fitojmë të gjitha ndeshjet. Ky stadium është pronë e të gjithëve. Nuk duhet të lejojmë që të vijnë palo tifozë për të shkatërruar ndeshjen. Unë nuk do të lejoj më që këta tifozë të bëjnë të tilla gjestesh. Nuk duhet të bëjnë gjëra të shëmtuara.", deklaroi presidenti i nderit të Kukësit, Safet Gjici.